Señora Jeanine Tromp encuanto ‘Orange The World’
ORANJESTAD (AAN): “Orange the World” ta un campaña mundial contra violencia di hende muhe. E meta ta pa crea conscientisacion, promove igualdad di genero y uni comunidadnan pa elimina violencia completamente.
E campaña, “Orange the World” y 16 dia di activismo contra violencia di genero, ta dura di 25 di november te 10 di december. Señora Jeanine Tromp, Gender Consulent di Cedehm, den un entrevista cu DIARIO a splica tocante e programa di Cedehm pa e edicion di “Orange the World” di e aña aki.
Cedehm ta organisa un simposio especialmente pa nan partners y profesionalnan y lo trata e lucha contra violencia y crimen digital contra hende muhe y mucha muhe na unda cu lo enfatisa prevencion, educacion y empoderamento di muhe den nos comunidad. E simposio ta tuma luga dia 26 di November y ta cuminsa for di 10:00 am te cu 2:00 pm na Boulevard Events.
