Promoviendo “Family Friendly World Places”
ORANJESTAD (AAN) Señora Enid de Kort, Trahador Social di Departamento di Asunto Social, Terapista di Pareha y Famia, tambe a hiba palabra durante e conferencia di prensa en torno na e Dia Internacional contra Violencia Relacional, y el a elabora riba nan contribucion na comunidad, den forma di charla, dialogo y tips.
El a menciona cu DAS tambe ta forma parti di “Orange The World Week” y nan ta promoviendo “Family Friendly World Places” loke ta nifica cu mas y mas nan ta bayendo na pia di trabao, dunando charlanan y dialoga cu pareha y famianan.
“Pa cu esaki Divi Resorts a habri su porta pa nos duna tur empleado un charla tocante parehanan y e impacto di social media, cu ta birando un hecho masha grandi, aki na Aruba. Anto nos ta bay dialoga cu nan, duna charla, pero tambe duna tips con por tin un miho relacion den pareha.
“Pa cu esaki tambe nos ta desea cu mas lugarnan ta habri nan porta pa duna charla na trahadornan, na pia di trabao. Pasobra nos ta conciente cu hopi trahado ta traha duro y ta dificil pa bay otro charlanan. Pues, esaki ta nos contribucion na e Orange The World Week, y promoviendo parehanan den relacionnan sano”, Enid de Kort a subraya.
El a agrega cu un charla ta importante pa e personanan keda cu dialogo, pasobra tin biaha tin puntonan cu bo ta bin na pia di trabao y cu por traha un charla riba esey. “Asina charlanan ta nace, ami cu ta traha tambe cu pareha, un asunto cu ta biniendo hopi dilanti aworaki, ta e social media, cu tin impacto riba relacionnan: kico ta ‘likes’, ken ta bo amistadnan, ora bo papia cu un ex cu despues ta bira mas interesante, mas intimo, y asina nos por sigui… e ta birando un topico cu ta bibando hopi den nos comunidad”, Enid de Kort, di DAS, a señala.
