Siman di SSSS na WEB un biaha mas tabata exitoso

ORANJESTAD (AAN): E compania WEB Aruba NV hunto cu S.V. W.E.B., a tene su evento anual,

‘Siman di Salud, Seguridad, Safety y Sport’ (Siman di SSSS), cual a tuma lugar dia 1 te cu 5 di september, 2025.

   Pa stimula movecion, a kick-off e siman cu e WEB Walk & Run cu a tuma lugar riba diadomingo 31 di augustus. E siman a habri cu diferente sesion na WEB pa enfoca riba bienestar di nos empleadonan y contratistanan.

   Parti di e programa a inclui e charla, “Un Boca Saludabel, Un Sonrisa Briante,” presenta pa Mirto Tromp, Dental Hygienist, cu a enfatisa e importancia di higiena dental pa bo salud en general. Durante e siguiente dianan, coleganan a haya e oportunidad pa haci un ‘Test di Salud.’ E test aki ehecuta pa enfermeranan certifica di Laboratorio Familiar a midi sucu, cholestorol y presion. Ademas, coleganan masculino di edad 40+ tambe a haya oportunidad di haci un PSA-test pa controla e nivel di antigeno specifico di prostaat.

   E Siman di SSSS ta yuda trece topiconan di salud y bienestar dilanti pa informa, educa y motiva nos coleganan pa cultiva habitonan mas saludabel.

   Nan ta gradici e team organizatorio di Siman di SSS consistiendo di coleganan di ERM, HRM y PR pa e bon trabao! Tambe un danki na SV WEB, e orador, enfermeranan, boluntarionan, y last but not least, nos coleganan pa nan participacion den un otro Siman di SSSS exitoso.