Reunion awenochi na Club Don Bosco
ORANJESTAD (AAN): Miembronan di Comision 11 ta invita miembronan di Sindicato SEPPA/CAPA na un reunion informativo ariba e ultimo desaroyonan, specialmente pa loke ta e casonan den Corte y otro acontecimentonan relaciona cu SEPPA y CAPA.
E reunion ta tuma lugar awe Diamars 9 di September 2025, for di 7:30 pm te cu 9:00 pm na Club Don Bosco, cu ta den cura di Misa Santa Ana na Noord. E reunion ta hopi importante pa miembronan di SEPPA y CAPA ta bon informa.
Historia di Comision 11: Na April 2024 a ricibi informacion di un ladronicia den e cooperativa CAPA di 382.000 Florin, cu ta placa di miembronan di CAPA y cual ladronicia a sosode durante 9 luna, esta Januari pa September 2022. Den e reunionnan general di 2023 y 2024, miembronan no a ricibi suficiente informacion den detaye con e robo a sosode.
Comision 11 a lanta pa busca informacion ariba e robo. Nan a hiba un politica pa busca compromiso cu Directiva di CAPA, pasobra nos ta miembronan di CAPA, door di manda varios carta pa ricibi informacion, pero semper e contestanan tabata negativo. Nos a pidi y ta dispuesto pa paga e registro di acuerdo cu e statutonan di CAPA. Segun e hefe di administracion di CAPA, sr Tromp kende a bisa nos cu Tesorero Brito no kier pa nos ricibi e registro. Nos por a wak un lista di computer so, pero nada di ricibi copia, cual ta para den statutonan di CAPA.
Na juni 2024 nos a pidi Directiva di CAPA un reunion ariba varios asunto, pero como miembro di CAPA a ricibi ni un contesta di directiva. Pues directiva a hiba un politica pa confronta Comision 11. E posicion di directiva CAPA pa no ricibi Comision 11 a culmina cu a dicidi di bay Corte pa e.o. ricibi e registro di miembronan, esaki di acuerdo cu statutonan.
Comision 11 a gana e caso, y tin tur tempo ta warda pa ricibi e registro di miembronan. Despues di a gana e caso, a pidi e registro cerca directiva di CAPA, di acuerdo cu e veredicto, pero a ricibi nada. E hurista di CAPA/SEPPA sr. Duijneveldt a manda Comision 11 un carta cu directiva di CAPA ta apela e veredicto di Hues
Ora analisa e situacion pa tur hende por compronde: Dunamento di e registro na miembro cu paga, ta para den e statutonan di CAPA. E ta skirbi den e ley cu ta regarda e funcionamento di Cooperativanan cu directiva di un Cooperativa mester duna e registro na miembronan cu paga.
Un Hues a duna un veredicto cu directiva di CAPA mester duna Comision 11 e registro di miembronan.
Directiva di CAPA ta keda para riba un NO. E registro ta importante pa nos por yega na 20% di miembronan, kendenan ta firma un peticion na directiva di CAPA pa obligatoriamente yama un reunion pa nos ricibi informacionnan adicional ariba e robo di 382.000 Florin, placa di miembronan. Kico directiva di CAPA ta bay busca den un caso di apelacion, si lesa e 3 puntonan prome menciona?
Te cu 12 di augustus 2025 (6 siman) nan tabatin e oportunidad pa apela e veredicto. A ricibi info for di Griffie na Corte cu directiva CAPA no a apela e caso. E carta di Duijneveldt ta mustra otro wega pa tarda cos. Nos a paga e 50 Florin caba, pa nos ricibi oficialmente e confirmacion cu CAPA no a apela e caso. Nos ta wardando trankilamente. Nos a purba di haya un compromiso cu Directiva, envano, perdiendo hopi tempo. Nos a bringa mas cu un aña den corte pa gana e caso. Nos tin tur tempo, “Time is on our side”, yes it is! Comision 11 simpelmente ta busca claridad ariba e ladronicia di 382 mil. Nan peticion na directiva di CAPA pa e registro di miembronan keto bay ta riba nan mesa.
Situacion den SEPPA: Informacionnan cu nos a ricibi for di e diferente casonan den Corte ta mustra cu e situacion den SEPPA tambe no ta cos di gaba. SEPPA tin su statutonan y Reglamentonan Interno, cual ta e constitucion di SEPPA, pero e maneho hiba dor di e Comite Ehecutivo na cabes e Secretario General Brito, hopi biaha no tabata cumpli cu e constitucion di SEPPA. Mas bien e maneho ta yena cu violacionnan fragante di e constitucion di SEPPA.
Despues di e eleccion riba ultimo dia di e congreso anual di 2013, teni na April 2014, no tabatin eleccionnan mas den SEPPA. Statutonan di SEPPA ta bisa cu eleccion mester tuma lugar ariba e ultimo dia di e congreso anual di SEPPA.
Durante 2014 e presidente eligi den e congreso anual di 2013 a tuma su retiro y 4 miembro a keda. Reglamento Interno ta bisa den articulonan 37 y 39 cu e directiva mester consisti di minimal 5 miembro. Pues for di final di 2014 no tabatin directiva mas, tampoco eleccion.
Violacionnan di constitucion di SEPPA a causa falta di e controlnan necesario. Pues cada aña, durante 11 pa 12 aña, nos a haya un situacion di asina tanto violacionnan di Statutonan, articulo 19, lid 4 y lid 5. No tabatin control ariba e maneho di e Comite Ehecutivo den SEPPA; No tabatin control ariba Checks and Balance di SEPPA; No a duna decharge na e Secretario General y Tesorero.
Si nos conta acerca cada aña (11 aña) cu no tabatin eleccion pa directiva, acerca pa Secretario General, e violacionnan a totalisa na mas di 40.
E situacion aki no por sigui, pa e motibo aki tin un caso den Corte contra e Secretario General Brito, cual persona como lider maximo di SEPPA mester a guia SEPPA corectamente, sin violacionnan di e Constitucion di SEPPA. Nos mester para e desaroyo malo aki, pa cosnan no ripiti manera a pasa den un otro sindicato, TOPA, cual a keda 15 aña sin tene eleccion, cu e consecuencianan negativo.
Ta spera tur miembro di SEPPA/CAPA na reunion importante aki.
