Siman di Cinta Cora y Bisti na Locura ta di 24 pa 28 di October awor

Miosotis Tromp, Trahador Preventivo ta splica:

ORANJESTAD (AAN): Miosotis Tromp, Trahador Preventivo di Fundacion Anti Droga Aruba (FADA), a elabora den un entrevista, den cual a presenta tambe e poster di e Siman di Cinta Cora y e Siman di Bisti na Locura, tocante e fechanan cu e actividadnan aki lo bay tuma lugar.

E fechanan e aña aki lo bay ta di 24 pa 28 di October, unda cu e prome dia lo bisti un articulo cora, dia 25 lo por bisti un pijama of di un super heroe creativo, dia 26 ta e dia cu ta bisti na mea creativo y diferente, di 27 tin oportunidad di haci cabey na locura, y e ultimo ta hopi special pa FADA, mirando cu nan ta cumpli diez aña cu e actividadnan aki.

FADA semper ta uza e lema internacional cu e aña aki ta “Celebrate life. Live drug free”, pero e aña aki a dicidi cu nan ta laga un lema creative, presenta door di cualkier participante den e siman, cu lo ta e lema cu lo uza pa e siguiente aña, pues Siman di Cinta Cora 2023.

Miosotis a splica cu pa por participa ta hopi facil. Mester subi riba FADA su website cu ta: www.fada.aw unda ta bay haya e banner di Siman di Cinta Cora, ta click riba dje y yena e informacion cu nan ta pidi y pone bo potret. E ora ey e persona ta participante caba.

Despues di periodo di covid-19 e aña atrobe ta duna premio, pa celebra en grandi cu comunidad, ya cu e meta ta pa concientiza mundo pero tambe mustra e sosten, na un manera creativo y diferente. Asina, e aña aki ta bay tin diferente premio, pa participante di diferente categoria.  Participa den e Siman di Bisti na locura, un dia so ta haci un diferencia, segun Miosotis Tromp. Si tin cualkier pregunta por tuma contacto cu FADA. Mas den curso di October lo haya mas informacion tocante FADA su pin di e aña aki, y por subi su facebook unda nan lo provee comunidad di mas informacion tocante e actividadnan aki.