ORANJESTAD (AAN): Luna di oktober ta luna di conscientisacion riba cancer di pecho.
Den cuadro di e lucha aki, Aruba Bank un biaha mas ta hopi orguyoso di por sigui duna sosten na Mary Joan Foundation.
Cancer di pecho ta un malesa cu ta afecta hopi hende muhe como tambe hende homber rond mundo y Aruba no ta un excepcion.
Pa por sigui combati e malesa aki conscientisacion den nos comunidad ta un necesidad y mester di fondo. Pa e motibo aki, Aruba Bank a haci un entrega di un donacion di 10.000 Florin na Mary Joan Foundation.
Sharon Frӓnkel, Managing Director di Aruba Bank a haci entrega di e donacion na Arabella Colina di Mary Joan Foundation durante un bishita na e oficina principal na Camacuri.
Ademas di un contribucion monetario un grupo di empleado lo “volunteer” durante e luna di conscientisacion. Aruba Bank ta un banco cu un historia largo den sostene fundacionnan y institucionnan cu ta sirbi nos comunidad y cu ta crucial pa bienestar y futuro di tur esunnan bibando na Aruba.
Un biaha mas Aruba Bank ta gradici henter comunidad pa e sosten demostra na Mary Joan Foundation.
