‘Si e Baranca por a Papia’ den salanan di Movies Aruba

Produccion local di documentario

ORANJESTAD (AAN): E siman aki e documental Si e Baranca por a Papia: Storianan di Sclavitud lo estrena den tur sala di Movies Aruba: Gloria, Renaissance y Principal.

   Produci door di periodista Melissa Stamper, Elai Petronia y Randall Luidens  di The POV, e proyecto ta marca un momento importante den e panorama cultural di Aruba como un documental completamente produci na e isla, cu e enfoke riba un parti di nos historia cu hopi biaha a keda for di e combersacion publico: e historia di sclavitud na Aruba.

   Si e Baranca por a Papia ta investiga e historia di sclavitud na Aruba door di pone enfoke riba e luganan unda e pasado aki a tuma luga. Door di combinacion di investigacion periodistico, archivonan historico, mapanan bieu, dramatisacion y entrevista cu expertonan local, e film ta pone riba mapa e lugarnan cu awendia nos conoce manera cunucu, tereno of concessiegrond, pero cu tin un pasado mas profundo liga cu sistema di plantage y trabao forsa.

   E documental ta sigui e historia di personahenan manera Virginia, Juan y Thomas, cu nan bida a wordo registra den archivonan, pero cu awor nan historia ta bira visibel riba pantaya grandi. E produccion no ta solamente un relato historico, sino un invitacion pa reflexiona riba nos pasado y con e ta influencia nos presente.

   Publico henter ta invita pa mira e documental y participa den e dialogo tocante e pasado y futuro di nos isla. E documental lo pasa for di 5 di maart na Movies Aruba y lo pasa pa un siman na tur localidad. Pa mas informacion tocante orario di screening por bishita e website di Movies Aruba.