Directora di CEDEHM, Miangela Ras:
ORANJESTAD (AAN)-- Directora di Centro di Desaroyo di Hende Muher (CEDEHM), señora Miangela Ras, ta hopi contento cu e hecho cu e instancia aki ta yega su di 15 Aniversario.
El a comenta cu henter e team di CEDEHM ta orguyoso di celebra 15 aña di existencia, cu oficialmente ta di 8 di Maart, fecha den cual el a nace na 2011, riba Dia Internacional di Hende Muher.
“Nan ta 15 aña fabuloso. Desde e dia 1 mi ta parti di e team di CEDEHM. Mi tabata den otro posicion, e tempo ey, Coordinadora di Proyecto y na mitad caminda hefe di e departamento. Mi ta bisa cu CEDEHM ta hopi special, y ta algo di celebra.
“Mi ta hopi contento di a wordo permiti door di Dios y bida, pa mi forma parti di e team aki”, Miangela Ras a expresa.
Ras a bisa cu eigenlijk, e departamento aki a lanta 30 aña pasa, door di señor Henny Eman (dfm). “Den su prome gabinete, Directie Vrouwen Zaken a lanta. Na caminda el a bira CEDEHM, 15 aña pasa”, el a duna di conoce.
El a bisa cu e instancia aki a yuda cu awendia e hende muhe ta mas conecta, mas empodera, pero maske cu nan a braza e modelo economico, unda cu hende homber y hende muhe ta traha, ‘this is a good team’, sinembargo hende muhe ta esun cu a keda cu tur e rolnan tradicional toch. “Kiermen, eigenlijk un hende muhe cu ta traha, no solamente e ta traha tempo completo, pero ta traha ‘full time’ na cas tambe, e tin e cuido di e yiunan, di su mayornan, pues, e parti di cuido no paga ta riba lomba di hende muher”, directora di CEDEHM, Miangela Ras, a subraya.
