Setar y Digicel ta sponsor e campaña '5 for kids' di Kiwanis Club of Palm Beach

ORANJESTAD (AAN) – Kimberly Boekhoudt, Corporate Support di Setar NV y Thaina Maduro, Marketing Executive di Digicel, a elabora tocante e campaña 5 for Kids, cu Kiwanis Club of Palm Beach a lanza, Diabierna.

Kimberly Boekhoudt a bisa cu Setar NV como e compania nacional di telecomunicacion, semper a aporta cu varios iniciativa pa proyectonan pa yuda recauda fondo.

“Desde e yegada di Covid-19 nos a enfoca pa aporta un tiki mas cu por, pa asina yuda nos comunidad, y nos ta contento e biaha aki, cu nos por uni nos mes cu Kiwanis Palm Beach Club, pa asina por recauda fondo. Tambe nos kier a invita pueblo di Aruba pa manda un SMS cu e mensahe ‘5 for kids’ pa e number 250 pa asina por duna bo contribucion. Corda cu pa cada SMS bo ta contribui cu 5 florin”.

Thaina Maduro, Marketing Executive pa Digicel Aruba, tambe a elabora riba e participacion di e compania aki.

“Nos ta hopi orguyoso y tambe contento pa participa den e iniciativa aki, cu Kiwanis Club of Palm Beach a bin cune. Manera hopi hende sa caba, Digicel ta un compania cu semper ta purba yuda mas cu ta posible cu ta nos compromiso di responsabilidad social, y ora e oportunidad aki a presenta pa por uni den e campaña aki, pa yuda e muchanan di Aruba, nos no a pense dos biaha, y a bisa si na esaki, unda cu tur nos cliente por manda un mensahe, manera a wordo splica anteriormente caba. Na # 250 bo ta manda ‘5 for kids’ y e donacion aki ta bay directamente pa Kiwanis Club pa wordo duna na e muchanan di Aruba”.