ORANJESTAD (AAN): Diahuebs ultimo dr. Rudy Lampe den su capacidad como minister di Enseñansa, Ciencia y Desaroyo Duradero a sera conoci cu e candidato cu Colegio di Supervision di Universidad di Aruba a scoge pa ta e sucesor di dr. Glenn Thode, como Rector di e instituto entrante 1 juli 2021.
Herry Koolman y Angelo Brete den nan capacidad di respectivamente, Presidente y Presidente Suplente di e Colegio di Supervision tabata presente na oficina di Minister Lampe, mientras cu Dr. Heutger a reuni den forma virtual.
Dr. Viola Heutger anteriormente tabata afilia na Facultad di Derecho di Universidad di Antiya Hulandes (actualmente conoci como University of Curacao) como decano di e facultad.
Dr. Heutger a obtene su doctorado na aña 1998 na Universidad de Salzburgo na Austria riba e tema di derecho laboral y descanso dominical. Como docente y profesor invita, Viola Heutger tabata afilia na universidadnan di Utrecht y di Maastricht.
Tambe Heutger tabata afilia na Open Universiteit y Vrij Universiteit na Amsterdam, Anton de Kom Universiteit na Suriname y entre otro na e universidadnan di Viena, Palermo y Pisa. Como parti di e ‘Flying Faculty’, dr. Heutger a duna apoyo na e establicimento di facultadnan di derecho na e universidad Turco-Aleman na Instanbul, Universidad di Hasselt na Belgica y Universidad Sigmund Freud na Viena, Austria.
Dr. Heutger ta un hurista y a asesora a comisionnan legislativo na Surinam, Curaçao, Kosovo y Polonia. Su experiencia den maneho y liderazgo a worde obteni den su funcion como Decano di e Facultad di Derecho y como miembro di Junta de Supervision di e Mision di Marinero Aleman. Pa mesun organizacion aki dr. Heutger ta observadora di International Labour Organization na Ginebra.
Den e periodo nos dilanti, Viola Heutger a keda di dedica na sostene procesonan di acreditacion cu ta salvaguardia e calidad di enseñansa. E ultimo añanan Universidad di Aruba, bao di liderazgo di dr. Glenn Thode a incia proyectonan desafiante, manera e progama SISSTEM, cu apoyo di Union Europeo. Dr. Heutger ta determina pa continua den e rumbo aki y sigui contribui na innovacion y internacionalisacion. Den e añanan nos dilanti Universidad di Aruba mester desaroya su mes den un centro de conocemento pa tur residente cu ta studia, na forma online, den exterior of na Aruba mes.
