Premier Wever-Croes
ORANJESTAD (AAN): Diabierna 30 di April anochi, Prome Minister Evelyn Wever-Croes den un discurso nacional via canalnan di television y radio emisoranan local, a enfatisa cu e final di e pandemia pa Aruba ta den bista y nos por mira luz na final di e tunnel.
“Aruba ta den e momento crucial den e retonan actual, y na caminda pa un etapa nobo y importante pa nos pais. Manera conoci, bida na Aruba y den mundo henter a cambia na comienso di aña 2020 momento cu Covid 19 a drenta paisnan y cambia tur cos.
Na Aruba Gobierno a actua mesora prome pa segura e salud di cada ciudadano, y despues pa duna asistencia financiero na esnan mas afecta pa e pandemia. Negoshinan a cuminsa cera y hendenan a cuminsa perde trabou.
Un di e hendenan aki tabata Juan di Santa Cruz. Di un dia pa otro, el a keda sin trabou y sin entrada. Mesora Gobierno a bin cu un sosten financiero y Juan por a ricibi Fase, 950 florin, cu a yud’e pa por pone cuminda riba mesa pa famia. Manera Juan, aña pasa 12 mil persona a wordo yuda pa Fase.
Pa evita cu mas hende perde trabou, Gobierno a bin cu e proyecto di subsidio di salario. Un subsidio na doño di trabou, pa trahadonan keda cu nan trabou y cu nan salario.
Maria Elena, ta biba na Aruba ya pa mas di 15 aña. E tin 3 yiu cu ta bay scol.
Maria Elena ta traha na un hotel grandi y tabata na punto pa perde su trabou. Pero danki na e subsidio di salario, e subsidio di gobierno na e hotel, e hotel por a mantene Maria Elena riba payrol, y Maria Elena por a haya gran parti di su salario, apesar cu e hotel tabata cera. Y manera Maria Elena tin 21 mil otro mama y tata cu ta na trabou ainda DANKI na e subsidio di salario cu Gobierno a percura p’e, pa hunto nos sobrevivi e pandemia cu a afecta economia di henter mundo”.
Prome Minister Evelyn Wever-Croes ta gradici na e acuerdo cu Gobierno di Aruba a yega cu Hulanda, y e sosten di likides, cu a garantisa cu Fase y Loonsubsidie lo sigui na vigor e aña aki.
