Segun Minister Mervin Wyatt-Ras:
ORANJESTAD (AAN): Den un entrevista recien cu DIARIO, Minister Mervin Wyatt-Ras a splica cu adiccion tabata cay bou di Ministerio di Asuntonan Social y di Husticia, pero awor e ta cay bou di minister encarga cu Salud Publico.
El a remarca cu ta e intencion ta pa wak con e diferente facilidadnan aki tambe cay bou di Salud Publico y di aki traha riba con pa financia. Segun e, te ainda e cuido basico na Aruba ta wordo financia door di Gobierno. Pa casnonan mas dificil, cu tin e parti di salud mental, ta wordo cubri door di AZV.
Sinembargo, Wyatt-Ras a expresa, e cuido ta hopi caro. “Si bo bay pone tur e casonan bou di AZV, ta manera carga awa hiba lama pasobra e lo costa hopi,” el a expresa. El a agrega cu mientras hopi pais ta gaba cu nan sistema di cuido, na Aruba tambe nos sistema di cuido ta hopi bon organisa. P’esey, Gobierno y AZV mester busca un forma pa carga e responsabilidad hunto, cu e metanan cu cada un tin.
Esaki, segun e minister ta un proceso. Actualmente, adiccion ta cay bou Ministerio di Salud y ta wordo mira como un malesa. Antes, e tabata wordo mira mas como un asunto social unda por a aloca esaki bou cualkier ministerio, despues como un asunto di Justicia, cu ta e parti represivo. Awor, segun e, tin caminda pa cana pa reconoce y trata adiccion como un asunto di salud.
Wyatt-Ras a bisa cu no ta solamente placa ta importante. Mester wak tambe ki tipo di ayudo un persona mester. Tin instancianan humilde cu ta acepta cliente, hasta ora esaki ta bay pafor di nan metanan, pa por duna ayudo na casonan dificil. “Na esaki nos mester yega tambe, cu nos ta coopera cu otro pa asina nos por haci e ayudo aki uno comun di Aruba”, e minister a enfatisa.
Minister Wyatt-Ras a agrega cu Gobierno ta explorando e posibilidad pa un miho luga pa personanan cu no por keda den un facilidad boluntario. Esaki ta dificil y mester cooperacion di otro instancianan, sea ambulatorio, via consulta of overleg, pa garantisa cuido adecuado.
“Nos no por keda dependiente di exterior cu ta un solucion temporario,” e minister a bisa. Aruba mester desarroya su mes formanan pa atende su hendenan aki na Aruba mes.
