Setar a anuncia evento grandi di gala pa Carnaval

ORANJESTAD (AAN): Den fin di siman, e compania dinamico Setar NV a anuncia un Gala event grandi cu lo ser teni na comienso di aña nobo.

   Director Roland Croes a splica cu pa hopi tempo caba, Setar NV ta dedicando su mes masha hopi pa sostene Carnaval di Aruba, y awor cu ta bay festeha 70 aniversario di Carnaval, y a dicidi na haci un dedicacion amplio den e spectrum cu ta cubri musica carnavalesco.  E keda brainstorm riba e homenahe, y esaki a desemboca awor den un gran evento di gala.

   Ta trata aki di e evento cu ta “Tribute to 70 Years of Carnival Music”.  E ta stipula pa tuma lugar riba Diabierna dia 5 di Januari 2024 den Renaissance Convention Center.

   Setar a splica, cu durante e anochi publico lo recorda e mihor Roadmarchnan cu a sa domina nos cayanan durante 70 aña di Carnaval, e fiesta cultural mas grandi cu Aruba ta celebra.

   Croes a splica cu e Tributo aki ta wordo haci na un forma hamas presenta prome.  Esey ta den forma di un orquesta completo principal cu lo ta riba escenario.  Un orquesta cu como 13 musico tocando instrumento di blaas, y cu mas musico combina di Aruba y di exterior.  Nan lo produci musica di calidad riba stage, y e cancionnan aki lo bay wordo graba pa keda den archivo pa cu historia di Carnaval di Aruba.

   Setar NV sa di e importancia cu Carnaval tin como parti esencial di Cultura di e isla, y e evento aki lo ta algo cu lo enfoca riba e recuerdonan grandi.

   E tributo aki lo tin e cantantenan compaña pa un Big Band cu lo sorprende tur hende e anochi aki. Tickets ta obtenibel awe, solamente via e app di Pay.aw. Sigura bo ticket pa bo no keda afo.

   E prominente musico local Carlos Bislip, a indica cu e Tributo aki lo cuminza pa 8:30 pm, y a splica cu portanan ta habri caba for di 7:00 pm.  Nan ta mira cu e evento lo bay ta uno sold-out, pues cumpra bo ticketnan adelanta.