Ya prome cu solo a sali Diadomingo cu a pasa hopi participante tabata cla pa e 'Diabetes Fun Run & Walk'

Bon acogida pa e evento aki di concientizacion

ORANJESTAD (AAN) – Apenas solo a sali Diadomingo ultimo, dia 12 di November, un cantidad grandi di hende tabata cla caba, pa participa den e actividad “Diabetes Fun Run & Wak”, saliendo banda di Botica di Servicio Eagle.

Manera ta conoci e meta di e evento aki ta pa concientiza pueblo di Aruba tocante e problema grandi di Diabetes cu tin  na Aruba.

Segun e organizacion di actividad aki, Franz Sydow, e problema di Diabetes na Aruba ta hopi grandi, unda cu den nos poblacion tin dos biaha e cantidad promedio mundial, loke ta nifica cu 16% di nos poblacion tin diabetes.

Ta bon pa reitera cu segun Sydow cu nos tur tin hende cerca, famia cu ta deal cu esaki y pesey e meta di e careda aki ta pa logra concientiza nos comunidad cu mester bin un cambio, pa asina nos por tin un poblacion mas saludable pa sigui bay dilanti.

 Lamentablemente den nos poblacion hoben tambe tin mucha cu tin sobrepeso, y pesey e organizacion ta trahando cu jump 18, cu ta enfoca riba nos muchanan aki, y siña nan kico nan por haci pa nan cambia nan estilo di bida.

Manera ta conoci e careda a cuminza cu e distancia di 10 kilometer for di Botica Eagle for di 5.45’or y a bay te The Cove bin bek. Esun di 5 km a sali for di Botica Eagle pa 6’or te cu Blue Residences y bin bek. Y pa 7’or a cuminza tur e caredanan den e categoria di 4 aña te cu 16 aña.

Diario a haya informacion cu varios participante a confronta problema cu sea contraccion di musculo, cansancio of sacamento. Segun experto esaki tin di haber cu e condicion di e clima riba e mainta aki, combina cu e presion atmosferico hopi abao.

Seguidamente, DIARIO ta comparti varios potret di e evento aki unda hopi ciudadano a join pa concientiza nos poblacion tocante e problema serio di Diabetes na Aruba.