Serie di evento cultural pa conmemora Abolicion di Sclavitud

We Culture, PNHSA hunto cu CEDE ta presenta esaki

ORANJESTAD (AAN) Bao di lema “Herencia, Resiliencia y Futuro”, fundacionnan We Culture hunto cu Plataforma Nacional di Herencia di Sclavitud na Aruba (PNHSA) ta presenta un serie di evento pa conmemora y celebra e abolicion di sclavitud na Aruba y den islanan ABC. E programa pa 2025 ta e di cuater biaha cu ta organisa actividad pa marca e fecha di y rond di 1 di juli. Na e ocasiona aki, ta inclui un seleccion varia di evento educativo, artistico y ritmico.

   E eventonan principal ta Diahuebs dia 19 di juni – “From Africa to 808’s” na Fort Zoutman, Oranjestad, pa 7 pm. Un anochi di expresion y refleho musical riba e papel historico di ritmo, di tambor Africano te na Hip Hop moderno. Rapper local Ritmo Real lo ofrece su inspiracion den un presentacion profundo cu ta lanta consenshi y reconexion cu nos raiznan.

   Tambe dia 22 di juni – “From Africa to 808’s” na Scol di Arte, San Nicolas, pa 7 pm. Ta continua cu un segundo anochi di expresion creativo cu e talentoso Judah The Lion, un artista hoben Arubano cu lo haci su debut den un show cu ta haya inspiracion for di historia y speransa.

   Tambe dianan 28 y 29 di juni – “Voices of the Drums” na Fort Zoutman y 29 di juni na Scol di Arte di 7 pm pa 10pm. Un agrupacion femenino di Hulanda ta trece un presentacion poderoso cu tambornan tradicional cu ta honra e spirito di resistencia di nos antepasadonan. E show ta un dialogo musical cu ta un yamada pa sentimento, reconocimento y union.

   Segun Sonny Richardson, representante di Pensa y We Culture, “Tur evento ta invita nos pueblo pa wak den nos mes, pa sa loke tabata scondi den e historia y pa honra e resistencia di nos antepasadonan. E ta un momento pa reflexiona, pero tambe pa celebra nos cultura cu a sobrevivi y florece.”

  Tur evento tin entrada liber como motivacion pa hopi hende por participa y beneficia di e rikesa di conocemento y cultura. E organisadonan ta haci un yamada na pueblo: bini pa siña, pa sinti y pa conmemora hunto.

  Pa mas informacion, sigui We Culture y PNHSA Aruba riba canal social. E iniciativa aki ta sostene pa CEDE Aruba y otro aliado cultural.