Rubiella Toppenberg, Trahado preventivo:
ORANJESTAD (AAN) – Fundacion Anti Droga Aruba (FADA) a yama un conferencia di prensa den cual a haci un anuncio na comunidad di Aruba, tocante un di e trabaonan cu FADA ta bezig cu ne, entre otro un tayer di trabao yama “Journaling”, cu lo tuma lugar diasabra 28 di Juni, di 6’or di atardi pa 9’or di anochi, na Boulevard Events.
Rubiella Toppenberg, trahado preventivo di FADA, a duna di conoce cu recientemente, nan a caba di sali di un proyecto basta grandi cu nan ta prepara tur aña cu ta “Mind Matters”.
“For di Mind Matters nos ta saca basta informacion di comunidad cu ta atende, mirando cu e tin un audiencia hopi grandi di entre mas of menos 400 pa 500 hende, riba e topico di Salud Mental”, Rubiella a relata.
El a splica cu semper FADA ta scucha su invitadonan y kico ta e deseonan cu nan tin, anto un di e deseonan cu hopi biaha nan ta scucha ta bin dilanti ta ‘con mi por yuda mi mes’, ‘con mi por yega na solucion pa e batayanan cu mi ta bataya mi mes, pa mi salud mental’.
“Nos ta kere cu ta hopi importante pa e ciudadano por yuda su mes tambe. Apesar cu tin docternan cu por yuda pa enfermedadnan mental, ta hopi importante tambe con bo por yuda bo mes. Esaki ta algo cu FADA ta para p’e, con nos por yuda educa e comunidad riba esaki. Y p’esey e proyecto cu nos ta haciendo e ultimo temponan riba salud mental, ta hopi basa riba esaki”, Rubiella Toppenberg a señala.
El a agrega cu dia 28 di Juni FADA ta bay organiza un evento, unda ta bay yuda comunidad den un forma pa trata nan Salud Mental, e problemanan cu nan ta bataya, anto p’esaki semper nan ta busca profesionalnan den e areanan cu nan ta bay uza, p’asina duna nan un sosten grandi p’esaki.
“Den e caso aki nos ta bay organiza un ‘Journaling workshop'. Un dia unda cu comunidad ta bin hunto. Nos ta bay habri un cupo pa mas of menos cien persona cu lo por atende esaki, unda nan por haya e oportunidad di siña un di e formanan ‘con bo por yuda bo mes cu bo salud mental’. P’esaki nos a acerca ‘Paper Sisters’ cu ta e profesionalnan pa loke ta haci Journaling y guia personanan den esaki”, Rubiella Toppenberg, Trahado Preventivo di FADA a relata.
