Rotary Club Aruba a honra Jeffrey Matos cu un ‘Paul Harris Award’

Pa añanan di Servicio dedica na nos Grandinan

ORANJESTAD (AAN): Rotary Club Aruba a entrega e Paul Harris Award na Sr. Jeffrey Matos, Director di Club Kibrahacha 60+, como reconocemento pa su dedicacion excepcional di mas di 18 aña di servicio na e comunidad di nos grandinan na Aruba.

   E premio Paul Harris, yama na nomber di e fundado di Rotary International, ta un di e honornan di mas halto cu un Rotary Club por otorga. E ta wordo otorga na individuonan cu ta encarna e lema di Rotary “Service Above Self” a traves di contribucion nan extraordinario na nan comunidad.

   Jeffrey a cuminsa su trayecto na Club Kibrahacha 60+ como un administrado y, bao di e mentor Sr. Eric d’Arnault (membrio honorario di Rotary Club Aruba), a traha su caminda pa bira Director na 2017.

Bao di liderazgo di Jeffrey, e centro a crece bira un institucion renombra den cuido di nos grandinan. Jeffrey a desaroya su mes den un vocero y lider dinamico di e centro, trahando incansablemente pa nos grandinan — tanto den e centro como den colaboracion cu diferente organisacionnan y lider nan politico den nos comunidad. Den e ultimo añanan, esaki a conduci na un atencion politico mas grandi pa e necesidadnan di nos grandinan y e importancia pa tene nan envolvi activamente.

   Club Kibrahacha 60+ ta un autoridad pionero y reconoci riba e tereno aki pa mas di 40 aña. Como co-fundador di Club Kibrahacha 60+, Rotary Club Aruba a haya ta apto pa honra Jeffrey pa su añanan di liderazgo y servicio otorgando e prestigioso Paul Harris Award.

  “Jeffrey ta un ehempel di e spirito comunitario y dedicacion,” asina Diego Acevedo, Presidente di Rotary Club Aruba a bisa. “Su trabou no solamente a enrikece e bida di e individuonan di edad avansa den nos comunidad, pero tambe a yuda trece un reconocemento mas amplio pa e balor di nos ciudadanonan di edad avansa den sociedad.”

   E reconocemento a wordo entrega durante e reunion semanal den presencia di miembronan di Rotary Club y representantenan di Club Kibrahacha.

   Rotary Club Aruba ta desea Jeffrey y su casa hopi exito. Pronto nan lo bandona Aruba pa cuminsa un capitulo nobo na Hulanda, embarcando riba un carera nobo. Un berdadero “role model”.