Seminario di Women’s Club of Aruba tabata inmensamente interesante

ORANJESTAD (AAN): Cu un sala “sold out”, Women's Club of Aruba a presenta e Seminario: “Embracing Change: it is coming your way” y e tabata exitoso.

   E seminario a tuma lugar recien na The Movies di Gloria Imax Theatre, y e organizacion Women’s Club of Aruba a prepara esaki pa recauda fondo, y a papia en general riba e aceptacion di cambionan cu ta na caminda.

   Durante e evento, varios orador y panelista a inspira esnan presente, a comparti nan conocemento y experiencia valioso. Tambe un y tur por a disfruta di diferente sorpresa durante ful e dia. Bo tabata sa cu door di baha bo airco cu 1% bo por spaar 6% riba e suma di cuenta mensual? Bo tabata sa cu nan por hack mas di 80% di password cu nos ta uza? Evita di usa bo nomber, fecha di nacemento of nomber conoci! Bo tabata sa cu Bucuti & Tara Beach Resort ta e prome y unico resort cu ta un Carbon Neutral Resort certifica den Caribe? Bo tabata sa cu marketing no ta e cosnan cu bo ta traha, sino e storia cu bo ta conta? Bo tabata sa cu incorporando un programa di sostenibilidad no ta solamente un asunto di concientisacion ambiental of etico, sino un decision sabi di negoshi?

   Bo tabata sa cu ‘mashin’ a cuminsa tuma over y cu nos tur tin cu bay recapasita nos mes pa e trabaonan cu ta biniendo? Tur esaki y hopi mas a keda presenta.

   E comision di Women’s Club of Aruba kier a gradici tur persona y compania cu a kere den e proyecto aki y a contribui na un manera of otro pa a haci esaki posibel. Women’s Club of Aruba ta existi ya pa 89 aña na Aruba y ta un organizacion non profit y multifacetico dedica na mehora comunidad. E entrada di e seminario aki ta pa recauda fondo pa por cubri gastonan pa e organizacion por haci varios proyecto social manera entre otro e proyecto anual di “Dress a Child” den luna di december, “Student Award”, cu ta honra e miho graduadonan di tur tipo di scol secundario, eventonan social pa nos grandinan y hopi mas.

  Women’s Club Aruba ta gradici e comision encarga pa hinca e magno Seminario aki den otro; Lelia Lacle, Joanaila Geerman-Lacle, Milagros Posner, Roxanne Vieira, Iraisa Wever, Monique Palm y Rhona Dijkhoff.  Esun cu a lidera e proyecto aki tabata Emily Perret-Gentil Ras.