Tres studiante mas di EPI a sali pa core stage na Resort grandi na Mexico

Ashley Frans cu Chevry van der Linde y Eleni Dijkhoff rumbo pa Riviera Maya

ORANJESTAD (AAN): Recientemente Ministro di Enseñansa Endy Croes hunto cu team di Colegio EPI: directora Ankie Danker, Sr. Andres Geerman cu ta forma parti di e directiva y coordinado di stage Señora Eddelyn Dijkhoff, tabata presente na e sala di VIP di Aeropuerto Internacional Reina Beatrix pa despedi di 3 studiante di Colegio EPI cu ta bay den exterior pa eherce nan pasantia.

   Tambe presente na e ocasion aki tabata PR di Iberostar Señora Ghislaine de Windt, kende a elabora riba e pasantia di e studiantenan di Colegio EPI den exterior. Señora de Windt a expresa cu nan ta orguyoso di anuncia nan sponsorship pa e segundo grupo di studiante cu ta biaha na Iberostar Playa Paraiso na Riviera Maya, Mexico, pa eherce nan pasantia.

   E periodo di pasantia ta di 5 di september 2023 te cu 13 di januari 2024. E di dos grupo aki lo haya diferente experencia den diferente posicion den “front of the house” di e hotel, entre otro, relacion publico, servicio pa guest y “Front Desk Reception”.  Parti di e compromiso di Iberostar ta pa fomenta talento hoben di Aruba. Iberostar a brinda alohamento completo y sosten pa nos studiantenan durante e periodo di pasantia. Pa duna back na e comunidad y inverti den e futuro lidernan di Aruba.

   Directora di Colega EPI Señora Danker ta gradici Gobierno di Aruba y Iberostar pa haci esaki posibel. Unabes cu e studiantenan aki termina, nan tin trabao garantisa. Señora Danker ta encurasha nos studiantenan pa studia na Colegio EPI, paso nan ta haya un oportunidad unico di eherce nan pasantia den exterior y desaroya nan mes. Banda di esaki, coordinado di pasantia di Colegio EPI Señora Dijkhoff ta expresa cu ta agredecido na Iberostar pa duna e studiantenan oportunidad pa eherce nan pasantia den exterior y ta encurasha tur otro compania cu kier colabora cu Colegio EPI pa acerca nan pa hunto yuda engrandece Pais Aruba.

   Sr. Andres Geerman a indica cu Colegio EPI tin diferente programa, unda ta yuda e studiantenan desaroya y bira internacional. E studiantenan Ashley Frans, Chevry van der Linde y Eleni Dijkhoff a expresa cu nan ta hopi contento cu e oportunidad aki cu nan a haya pa eherce nan pasantia den exterior. Pa finalisa, Minister Endy Croes ta gradici Gobierno di Aruba, Colegio EPI y Iberostar cu a traha den colaboracion pa realisa e proyecto aki y ta desea tur 3 studiante hopi exito durante nan pasantia di cuater luna na Iberostar Playa Paraiso na Riviera Maya, Mexico.