Parlamentario Alvin Molina ta mustra cu mester sigui inverti den agricultura

ORANJESTAD (AAN):  Hunto cu Minister Glenbert Croes nos a bishita STR Agriculture Farm na Alto Vista pa presencia e desaroyonan di agricultura na e cunucu.

E situacion ideal lo ta pa nos compania- y hendenan local mes por construi e sistema hydroponico, cual ta un tecnica innovativo cu proceso- y materialnan relativamente nobo.

            Na e momento aki, tabata necesario pa busca e experticio di afo. Si nos kier logra agricultura desaroya den un industria grandi y un pilar economico nobo, nos mester busca e conocemento, experticio y profesionalismo di afo pa nos cuminsa y/of “kick start”.

            Despues sigur esaki ta un tarea pa Minister di Labor y Minister di Enseñansa pa brinda nos pueblo e oportunidad pa ekipa nan mes cu conocemento riba un nivel cu nos mes por sigui carga e industria aki.

            Mi ta gradici Minister di Labor y Integracion Sr. Glenbert Croes cu a coopera cu e “farm” local aki, pa por a trece e experticio di afo y logra cu e proyecto grandi aki bira un exito. Mi peticion na tur Ministernan concerni ta pa sigui inverti den e industria nobo aki, y inverti den e cunukero local cu ainda ta haci nan ofishi na e manera tradicional pa nan tambe haya e cooperacion pa haya awa di calidad, energia, tereno y enseñansa.

            Nos mester percura pa Aruba por logra un “food security”, cuminda di calidad na un tarifa rasonabel. Primordialmente cu e meta cu nos mes por produci un gran parti di e cuminda na Aruba mes.