Seis empleado di HOH ta ricibi certificado di “Vertouwenspersoon ongewenst gedrag”

HOH y algun organisacion na Aruba ta pionero promoviendo miho ambiente laboral

ORANJESTAD (AAN): Un total di 6 empleado di Horacio Oduber Hospital (HOH) a ricibi recientemente nan certificado como Vertouwenspersoon ongewenst gedrag esta persona di confiansa pa conducta indesea. Nan a sigui e curso basico riba e topico importante aki guia pa profesionalnan di Hulanda. Un logro grandi pa Hospital y su empleadonan y alabes pionero den esaki na Aruba.

            Internacionalmente e tema aki ta conoci caba y awo na Aruba algun organisacion y HOH tamb a sera cabes y hunto a logra un comienso pa un miho ambiente y sigur na pia di trabou.  Pues e seis coleganan aki awo ta e caranan unda empleadonan trahadonan por yega cerca nan ora experencia conducta indesea.

            Como persona di confiansa pa conducta indesea bo tey pa scucha y brinda oido (tin biaha esey caba ta suficiente) y duna conseho. Preferiblemente lo desea pa conducta indesea no tuma luga mes, pero lastimamente 1 di cada 6 empleado ta indica, for di un encuesta na Hulanda, di haya nan mes den un situacion indesea na pia di trabou.

            Pues por bisa cu e ta pasa den tur organisacion, pero door di apunta persona di confiansa pa conducta indesea bo ta dicidi como organisacion cu e no ta aceptabel.   “Conducta indesea por ta sea acoso sexual, pero tambe bully, falta di respet, gritamento, pues loke abo ta experencia como un conducta indesea”, asina Rachel Kraaijvanger a duna di conoce. Cada un di e empleadonan aki ta mara na geheimhouding plicht y t’ey pa scucha, pa brinda ayudo, pa brinda conseho, pa mira kico por haci pa drecha esaki. Mas cu tur cos, nan t’ey pa promove conducta desea den e organisacion.

            Ta un grupo basta grandi na Aruba, entre diesseis y binti hende, cu a ricibi e certificado aki. Na HOH ta 6 colega a logra certifica pa persona di confiansa pa conducta indesea, esta Rachel Kraaijvanger, Steven de Cuba, Ruth Melendez, Karina Kelly, André Kolman y Milanka Murray. Di Boneiro tambe tabatin algun persona cu a ricibi nan certificado. Pa Aruba esaki ta algo completamente nobo. E no ta conoci na Aruba, pero na Merca y Hulanda e ta masha normal caba y pues e ta un bon desaroyo pa Aruba y su organisacionnan.

            Hospital ta boga pa un esfera di trabou safe y positivo na unda tur hende ta yega trabou cu gana di brinda lo miho y ta spera cu certificacion di e personanan di confiansa pa conducta desea por contribui grandemente cu esaki, sr. Jacco Vroegop di Hunta di Directiva a termina bisando. Hospital ta desea di curasha cada dunado di trabou pa paga bon tino cu esaki, specialmente si kier pa empleadonan ta contento na trabou. “Si bo kier un conducta desea na trabou, esaki ta un manera pa curasha esaki”. “Mi no ta kere cu no tin nada mas dushi cu tur trahado kier bay nan trabou y sinti nan mes sigur. Y sinti nan na un luga cu por traha den un ambiente dushi cu conducta desea”, Kraaijvanger a termina bisando.