ORANJESTAD (AAN): Parlamentario Shailiny Tromp-Lee di MEP ta indica cu diahuebs tabata e di 2 dia tratando presupuesto di Pais Aruba pa aña 2022.
Nos ta tratando presupuesto di Ministerionan di Turismo y Salubridad y di Transporte, Integridad, Naturalesa y Adultonan Mayor.
Un aspecto cu sigur mi a duna atencion durante mi prome tanda ta AZV. Sigur e tabata necesario y na su lugar mirando tur e discucion andando rond di AZV. Banda di e echo cu oposicion innecesariamente ta causando chaos y ta crea panico den comunidad, esaki toch a crea un grado di preocupacion y inseguridad bou di nos hendenan.
Durante di e reunion publico mi a subraya e realidad cu tur 21 parlamentario ta consciente cu nos mester reforma AZV y no pasobra cu Hulanda ta pidi of exigi esaki. Mi a pidi na mes momento pa ningun hende compronde mi malo pasobra te dia di awe mi ta contra e recorte di 60 miyon pa aña cu Hulanda a exigi mara na e sosten di likidez cu nan ta duna nos. Un recorte cu a bin cay di shelo y sin ningun splicacion alguno. Pero los di e discusion aki realidad ta cu nos mester actua responsabelmente pa loke ta trata AZV y nos no tin e luho pa keda sin haci nada pa AZV. Sigur no, si nos kier garantisa existencia di e fondo aki pa nos yiunan. Y ami sigur kier garantisa esaki pa mi yiu y nietonan.
Ta tarea di Gobierno, di Parlamento, di AZV y di nos tur pa por garantisa cu AZV ta keda sostenibel. Pa por haci esaki ta importante pa focus riba eficiencia. Den esaki entre otro Hospital y ImSan lo mester traha mas cu otro pa por logra reduci gastonan. Tin hopi oportunidad, ambos, na hospital y na ImSan. Nos mester sigui sondea posibilidadnan di crecemento y desaroyo por ehempel door di explora turismo medico. Desaroyo cu lo genera entrada pa gobierno y ami sigur lo sostene e iniciativanan aki.
Mirando e situacion di AZV mi a pidi Minister pa e elabora di e proceso cu a y ta tumanado lugar pa loke ta trata AZV, kendenan tur ta involucra of a keda consulta y kico ta loke por spera den 2022 pa loke ta trata AZV. Siman pasa Parlamento a reuni den comision di salud y segun e veld di cuido, AZV no ta dunando oido na nan. Ami a indica cu a base di peticion di Parlamento mes un Comision Nacional di Cuido a keda institui y cu nan a hasta entrega un rapport y dus no ta compronde e situacion aki y a pidi Minister pa duna un update.
Durante e reunion mi a garantisa pueblo cu na tur momento Fraccion di MEP lo percura cu pa cualkier reforma cu mester tuma lugar, esnan mas vulnerabel den nos comunidad ta keda garantisa di un cuido medico di calidad. Ya nos Fraccion a enfatisa na Gobierno y AZV cu nan lo mester percura, cu na momento cu introduci cambio of bin cu ahustacion, esaki mester ta en combinacion cu presentacion di un sociaal vangnet. Pesey mi a pidi Minister pa elabora riba e aspecto aki den su contestacion. Mi a pidi Minister pa indica con leu nos ta y kico pueblo por spera. Alabes mi a enfatisa cu mi ta haya hopi importante pa Gobierno splica pa tur hende compronde con e proceso pa loke ta trata posibel cambio of ahustacion pa cu AZV ta bay den practica. Esta si cambio den e ley ta necesario of cambionan por sosode via Lbham, pasobra na ambos manera Parlamento ta keda involucra.
