Tin un emisora nobo ta cuminza transmiti awe

ORANJESTAD (AAN); Informacion cu DIARIO ta dispone di dje ta indica cu pa algun luna caba tabatin trabaonan grandi andando pa loke ta preparacion di un radio emisora nobo na Aruba.

   Trabaonan tanto na e studio unda lo transmiti y elugar di transmision. Un ekipo grandi tras di lomba cu a traha for di mainta te cu anochi laat pa loke ta midimento, hisamento di antena, core kabelnan manera con e departamento di telecomunicacion di Aruba ta exigi pa bo ta na e reglanan stipula pa loke ta un radio emisora.

   E ekipo a cumpli cu tur e rekesitonan manera mester ta bao guia di e tecnico cu sa di radio na Aruba sr Sherwin “Win” Donata, kende tin aña den mundo di radio na Aruba. Win a kere den e ekipo hoben y tabata guia e trabaonan for di studio te na e sero di transmision. 

   Ya dia 11 di maart e prome señalnan a bay den aire sin ningun problema. Un transmision di prueba cu Aruba completo a scucha un señal limpi solido. 

   Awe Diabierna 1 di April 2022 como soft testing den aire e locutornan ta cuminsa estrena nan mes via Mas FM. Dialuna 4 di April oficialmente locutornan ta den aire.  E lo ta na frequencia di 105.1 MHz.

   Nan a splica DIARIO, cu e lo ta un radio emisora varia, cuminsando cu noticia cu un hende muher parti mainta. Sigui pa e programacion varia cu animacion di diferente locutor. Un radio cu tur hende por ta atento cu boletinnan di ora, momento cu cualkier novedad pasa riba e isla.