Secrets Baby Beach a yama bonbini na su prome huespednan

A.T.A. ta sigui apoya socionan hotelero na beneficio di Aruba

ORANJESTAD (AAN):  Diferente ekipo di A.T.A. a traha di cerca cu e hotel nobo Secrets Baby Beach. Tambe tin varios cu a haci un recorido caba. Diabierna ultimo Ronella Croes, CEO di Aruba Tourism Authority, hunto cu varios colega a bishit’e, un dia despues cu Secrets a habri su portanan. Por a mira e hotel den accion.

            Durante e recorido tabata t’ey presente Jose Maria Perez de Ureta, gerente general di e hotel, Fernando Vega, director financiero y Ricardo Portillo, como director comercial. Di parti di A.T.A. tabat’ey Ronella Croes, Maas van Drie, Patrick Melchiors y Gemey Zara. A mustra nan e cambernan, SPA, gym, e diferente restaurantnan y otro facilidadnan di e hotel.

            Secrets Baby Beach by Hyatt a habri su portanan oficialmente diahuebs dia 5 di juni ultimo. E ta un ‘soft opening’ permitiendo e propiedad pa test, mehora y gradualmente ricibi mas bishitante. Riba e prome dia a yama bonbini na 52 camber, di dos dia el a bira 80, di tres dia 90 y despues di cuater dia ta surpasa 100 camber te yega 40% di e ocupacion total.

            E partner nobo aki di Aruba den e pilar principal di nos economia, ta mustrando nan compromiso pa calidad. Grupo Martinon, di Spaña, tin propiedad na Republica Dominicana y Mexico tambe y Secrets by Hyatt ta nan prome aki na Aruba. Secrets by Hyatt ta un proyecto di 160 miyon dollar.

            A.T.A. a tuma nota di e cantidad grandi di empleadonan cu ta di e area di San Nicolas. Tambe por a nota clientela mixto, esta di diferente pais. Algun a bishita como clientenan fiel di Secrets y algun otro ta cliente fiel di Aruba cu kier hospeda na e otro banda di e isla. A dialoga hopi riba e necesidad di maneha e fluho di bishitante debidamente, subrayando e inversionnan haci den e zona aki (Baby Beach, Rodger’s Beach entre otro) y tambe locual tin intencion pa continua cu ne. Pero tambe a subraya e echo cu ta importante mantene e caracter unico di San Nicolas cu e acento riba proteccion y asistencia di e cadena di Secrets den esaki tambe. A.T.A. ta comprometi pa sigui brinda asistencia pa cu e area di San Nicolas, tambe pensando aki riba e centro di e ciudad.

            A remarca tambe cu e ultimo hotelnan cu a habri, esta Joia, St. Regis y Secrets ta amplia e posicion di Aruba den e segmento di esnan cu ta busca biahe di luho. E interes y demanda den e productonan nobo aki ta grandi.

            Ta gradici gerencia pa e recepcion y ta felicita y desea e ekipo completo, hopi exito!