Minister di Husticia a inspecciona facilidadnan di Inmigracion na Aeropuerto Reina Beatrix

ORANJESTAD (AAN): Diamars 3 di juni, Minister di Husticia, mr. drs. Arthur Dowers,

a haci un bishita oficial di trabao na Aeropuerto Internacional Reina Beatrix, den cuadro di un inspeccion di e facilidadnan cu ta resorta bao di su responsabilidad. Durante e bishita, Minister Dowers a pone enfasis riba e facilidadnan di Inmigracion, un area cu recientemente a haya atencion di media den un contexto negativo, relaciona cu rijnan largo di espera pa pasaheronan cu ta saliendo for di Aruba.

            Minister Dowers a enfatisa cu Aruba ta confrontando un “problema di luho”: un nivel di turismo sumamente halto cu e infrastructura actual no ta completamente capacita pa atende di manera optimal. Tin mas turista cu nos sistema actual por maneha cu rapides, pero esaki no ta un motibo pa keda sin haci nada. Aruba mester sigui inverti den solucion practico y sostenibel.

            Den pasado a inverti den sistemanan moderno manera Happy Flow y E-Gates, cu ta parti di e esfuerso pa modernisa y acelera e proceso migratorio pa salida. Sinembargo, e situacion actual ta rekeri un evaluacion serio di e siguiente pasonan pa implementacion. E meta ta cla: mehora e experencia pa tur bishitante cu ta saliendo for di Aruba y garantisa cu e proceso di salida ta tuma luga den un ambiente cu airco y no den cayente riba acera.

            Minister Dowers a reafirma su compromiso pa sigui traha hunto cu e autoridadnan competente, incluyendo Departamento di Inmigracion, Directie Luchthaven, y otro actornan clave, pa logra un mehoracion concreto y sostenibel cu ta pone nos aeropuerto na nivel mundial.

            E inspeccion ta parti di un esfuerso mas amplio pa evalua e funcionamento di e facilidadnan na nos puntonan di entrada di salida cu ta regarda husticia, y pa traha riba un modelo operacional cu ta sirbi tanto e bishitante como nos localnan.