Melva Croes-Yanez di Fundacion Alzheimer
ORANJESTAD (AAN): Melva Croes-Yanez di Fundacion Alzheimer a elabora den un entrevista cu DIARIO, cu desde 2011 nan a cuminsa cu e lema 'Stop cu Abuso di Anciano', cu ta un proyecto di Fundacion Alzheimer Aruba, den ultimo añanan, specialmente durante temporada di COVID, nan a cuminsa registra un aumento den cantidad di abuso di adultonan mayor.
Segun señora Croes-Yanez, nan a pensa cu despues di COVID, e situacion por a mehora, pero ta net lo contrario, y e abuso hasta a bira mas sofistica, pasobra abusonan no ta tuma lugar manera nan a custumbra den pasado, awendia nan ta wak hopi intimidacion y specialmente entre 'baby boomers' cu a siña di tin respet na autoridadnan, y esey ta causa tin biaha cu nan ta haya miedo pa entrega keho na autoridadnan. Tin hopi caso na unda un yiu tin poder riba e cuenta bancario di e adulto mayor y e yiu ta abusa di esaki, kiermen un explotacion financiero. Tin tambe cu no por warda te e 'bieu' muri pa asina haya nan herencia.
E baby boomers ta e pensionadonan cu a logra spaar, cumpra cas y tin tur cos bon regla hasta pa nan entiero y ta nan yiunan ta bay beneficia di esaki.
El a splica cu tin hopi tipo di abuso di Adulto Mayor y cu hende no ta pone atencion of no sa cu e ta sosode mes. Discriminacion pa edad mes ta un. Por ehempel, asina un hende ta cumpli 70 aña, Adultonan Mayor no ta haya cierto servicio medico. Tin tambe discriminacion den parti social, na unda hende ta falta respet na e Adultonan Mayor, cu expresionnan mahos y menosprecio. Señora Croes-Yanez a indica cu nan ta trahando diferente aliansa cu instancianan internacional pa ataca e tipo di situacionnan aki.
E ta invita comunidad pa asisti na e Simposio 'Promove Proteccion y Husticia pa e Victima di Abuso di Adulto Mayor', cu lo conta cu participacion di oradornan di mundo bancario pa elabora riba e parti financiero y tambe dokter Jayburt Dijkhoff y representantenan di ImSan, mirando cu hopi cos den cuido medico pa Adulto Mayor no ta bay manera mester ta y mester di atencion.
Simposio 'Promove Proteccion y Husticia pa e Victima di Abuso di Adulto Mayor' lo tuma lugar di 14 di juni, pa 11'or di mainta te cu 4'or di atardi na MFA Santa Croes. Inscripcion ta cuminsa 10:30 di mainta y entrada ta gratis.
Señora Croes-Yanez a bisa cu Fundacion Alzheimer tin hopi proyecto na caminda y cu ta nan deseo pa traha cu Gobierno y stakeholders riba e tereno aki, pasobra e ta na beneficio di nos grandinan.
