Scouting Aruba a celebra Dia di San Jorge na un forma sublime!

Dia 23 di April ta e Dia hopi celebra pa gruponan scout rond mundo, y Scouting Aruba semper ta conmemora e fecha aki y dia 22 a celebre cu un evento grandi,

cu participacion di mas cu 350 miembro. E evento special aki a tuma lugar na Carnival Village.

Pa e ocasion aki Lucio Kock a bisa un bunita oracion. Señora Marcia, kende a fungi como MC, a gradici señor Kock. Despues a sigui cu hisamento y saludo di bandera. E muchanan scout tabata luci sublime den nan uniform y mustrando nan disciplina.

A hiba palabra señor Lake, den nomber di e directiva di Scouting Aruba. El a expresa palabra di bon bini na tur presente den e celebracion aki di Sint Joris Dag 2023.

Riba e dia tan special aki scoutnan ta bin hunto y ta renova nan promesa. Esaki ta meramente pa nan por recorda nan mes di e fundamentonan, e motibo pa cual nan a bira scout, sea siman pasa, hopi aña pasa, of recientemente. Pa cada un di nan tabata un momento unda nan a tuma un decision conciente di forma parti di e organizacion grandi aki.

Scouting ta un organizacion di mas di 50 miyon di miembro, den tur pais rond mundo.  “Y awe, specialmente riba Dia di San Jorge. Riba e dia di awe, nos ta recorda con San Jorge a dicidi como persona pa bay defende locual ta bon, contra loke ta malo. Si nos ta wak esey pa nos dushi tera cu nos ta biba riba dje, nos mundo, e ta nos trabao tambe pa nos por contribui na drecha y duna nos granito, pa haci di e mundo aki uno miho mundo; mas sostenible, mas husto, caminda tin igualdad, unda nos tur ta convivi, unda nos tur tin respet y aprecio pa otro, caminda nos tur ta biba hunto y dunando nos contribucion  pa haci e mundo aki, y specialmente nos pais Aruba, uno mihor y mas igual pa nos tur”, señor Lake a expresa. El a conclui deseando un y tur un feliz dia di San Jorge, den nomber di e bestuur y e Comite Nacional di Scouting Aruba.

Seguidamente sra. Marcia a yama cada grupo scout pa nan haci nan formacion, pa cuminza cu e desfile.

A cuminza cu grupo scout Sint Paulus Michael, Grupo Scout Sint Joris, Grupo Scout Monsignor Oscar Romero, Grupo Scout Sint Jacintus, Grupo Scout Cacique Macuarima, Grupo Scout Santanero, Grupo Scout Ora Ubao, Grupo Scout San Dominico, Grupo Scout Casibari, y Grupo Scout Sonrisa.

Seccion Hubentud den Movecion ta saluda Scouting Aruba y felicita nan pa nan bunita evento, y nan trabao cu nan ta haci yena cu motivacion.