SANTO DOMINGO: President di Republica Dominicana, Luis Abinader a haya necesario e siman aki pa declara “un emergencia” pa e costanan di e paisnan cu ta wordo afecta pa e yerba di lama conoci como ‘Sargassum’.
Na apertura di e seminario riba “Reto y Oportunidadnan di Sargassum”, e president a bisa cu paisnan cu ta wordo afecta tin di emiti e alerta aki den forma conhunto.
For di Gobierno, lo bay start accionnan diplomatico pa asina via di algun organizacion multilateral, nan por logra haya demas paisnan afecta declara esaki como un ‘emergencia’, el a bisa.
E siman aki na Republica Dominicana, como 88% di e perimetro di nan costa ta bao atake di sargassum. E aña aki nan ta mira cu e lo bay ta un record pa e yerba di lama aki. Costanan di Merca, y tambe parti nort y zuid di Mexico ta wordo afecta pisa.
Pesey Republica Dominicana a dicidi cu lo haci un donacion di 1 miyon Dollar pa universidadnan usa e fondo aki pa investiga e problema aki. Na e pais di merengue, e sargassum aki a afecta varios planta di genera coriente, y mester a tuma medida drastico den e zonanan ey.
