Scol di Curaçao a pasa bishita Archivo Nacional na Aruba

ORANJESTAD (AAN): Recientemente, Archivo Nacional Aruba (ANA) a haya bishita di Emmy Bertholdschool F.O. di Curaçao,

cu ta un scol di Unesco. E scol aki ta bou di encargo di señora Suzette Davelaar-Efraci y a bishita ANA cu un grupo di 11 maestro di e scol aki pa asina conoce mas di historia di Aruba y tambe cu e trabaonan cu ANA ta desplega.

   E grupo aki durante 3 dia nan tabata na Aruba pa un bishita di trabao cu e meta pa profesionaliza nan mes mas door di bishita otro instancianan di enseñanza na Aruba y algun scolnan, y asina intercambia experiencia y ideanan cu nan coleganan na Aruba. Alavez purba na crea un netwerk entre personal y instancianan den enseñanza y conoce mas di Aruba su cultura.

   Pa e ultimo aki tambe nan bishita ANA, no solamente pa haya informacion di Aruba su historia, pero tambe haya sa mas di meta di ANA y con ANA ta contribui cu e parti educativo di nos comunidad.

   Na e ocasion aki no unicamente ANA a duna splicacion di meta y tareanan di e instituto, sino e docentenan a haya oportunidad pa admira e exposicion Diaspora Arubiano. Tambe ANA a duna un demostracion y splicacion di loke ta trata e “Coleccion Aruba” cu ta riba internet accesibel via coleccion.aw. Aki nan a worde mustra tambe cu e coleccion aki ta contene tambe varios materialnan di Curaçao. Asina nan a worde mustra riba un video di añanan 30/40, di Curaçao y nan a keda masha encanta mes.

Na final di e atardi, tabata tin intercambio di recuerdonan na otro.

   Archivo Nacional Aruba, kier a gradici Emmy Bertholdschool F.O. di Curaçao, pa a scohe pa e bishita aki na ANA. Tambe un danki ta bay na sr. Dufi Kock y su señora Ija Kock, kende a fungi como e contacto entre e Scol y ANA na prome instante.