ORANJESTAD (AAN): Riba Diabierna e tristo noticia a drenta for di Spaña,
cu e dama Carolyn Kelly kende na comienzo di decada di 1990 a bira conoci pa su cancion cu a bira un hit na Aruba, a fayece.
Carolyn Kelly na comienzo di Mei a viaha pa Spaña pa bishita su yiu grandi cu ta biba aya. Diripiente riba 26 di Mei, e informe a declara cu el a fayece na forma repentino. Un noticia cu a laga henter famia, amigo, y coleganan den shock na Aruba.
Maureen Carolyn Kelly a nace dia 29 di Mei 1973 na Aruba, pues tabata di bay cumpli 50 aña Dialuna awor.
Hecho ta cu Carolyn Kelly ta bay laga un tesoro atras, den forma di un cancion cu den temporada di Pasco y Fin di Aña a resona hopi fuerte mes, esta e cancion ‘Wela’ presenta cu e grupo di Chicas Gaiteras. E tabata e cantante cu a presenta e tema ey cu a bira un gran clasico di Navidad pa Aruba.
Su fayecimento tabata un shock pa e.o. e ex-integrantenan di Chicas Gaiteras, incluyendo e motor Marion Maduro di e grupo aki.
Un palabra di condolencia ta bay na su rumannan Reynold Kelly, Elton Kelly, y Ariane Kelly. Forza na su mama Rita Petrochi, su yiunan Chris Arends y Kayla Arends, y na su pareha Carlos Lopez.
