Scol Basico Washington lo bay muda pa Piedra Plat pa lesnan den trailer

Dak di scol tin di wordo renoba pa gran parti

ORANJESTAD (AAN): Diabierna na momento cu DIARIO ta sacando potret di un fabuloso Vakantie Kamp na tereno di Centro Deportivo Franklyn Bareño na Piedra Plat, a tuma nota cu construccion ta andando pa pone algun Leslokaal Trailer riba e parti dilanti, unda tin e parkinglot full di concrete.

   A pensa na prome momento, cu kizas ta trahando mas lokaal pa complementa esnan cu ya caba tin eynan di Juliana School MAVO.  Sinembargo esnan presente a bisa, cu esakinan ta trailernan cu ta wordo arma eynan, pa wordo usa pa alumnonan di un otro school.

   A sali na cla, cu e klasnan nobo aki lo tin di bay acomoda alumnonan di Scol Basico Washington.  E alumnonan lo tin di bay haya les te na Piedra Plat, debi cu tin trabao di mantenimento grandi planea pa e scol basico cu tin den districto di Noord.

   E dak di como 3/4 parti di Scol Basico Washington tin di wordo reemplaza, y ora di haci e trabao aki, e docentenan no por duna les durante e trabao di renobacion.  Esey kiermeen cu tin di busca otro lugar pa nan bay haya les.

   Por corda cu na Augustus 2011 caba ora cu un hoos a pasa riba e scol, el a destrui algun lokaal.  DOW e tempo ey a drecha nan bek y hasta pone dak bek den bon condicion.  E tempo ey, e muchanan a haya espacio di les na Scol Primario Kudawecha.

   DOCENTENAN NO SA MES:  Pero awor ta demasiado klas tin di bay haya les otro lugar.  Como cu aworaki keto bay e edificio di VAD Printers na Boulevard ta ocupa pa Maria College MAVO y tambe St. Aloysiusschool, a opta pa usa tereno na Piedra Plat y pone algun lokaal trailers extra, incluyendo algun di nan cu ta di dos piso.

   Tin indicacion cu docentenan di Scol Basico Washington mes no ta na altura di e desaroyo aki.  Mas bien nan tabatin deseo di a haya lokaalnan temporal riba nan mesun tereno.  Esey ta debi cu e tereno di e scol ta basta grandi mas patras unda facilmente por a pone lokaal.

   Tambe tin algun comentario, pa mustra cu awor ta trahando lokaal temporal atrobe, siendo cu Gobierno tin 8 scol cera.  Envez di gasta placa pa huur container, di con no por a hinca e placa pa renoba e scolnan cera, pa asina tin espacio suficiente ora cu tin di haci trabao di mantenimento na otro scolnan.

   DIARIO a compronde cu no ta djis docentenan no sa nada di e ‘mudamento’ aki cu lo socede pronto, pero e mayornan tampoco.  No ta conoci si acaso lo usa sistema cu tur mayor tin di baha nan yiunan na e scol mes, y Bus lo transporta tur mainta e muchanan di Washington bay te na Piedra Plat, y merdia vice-versa.  Pasobra no ta conoci si acaso Arubus tin suficiente bus pa haci esey actualmente.