Hasta Nicolas Maduro a pidi Mike no mete den asuntonan di Venezuela
ORANJESTAD (AAN) — Cu Mike a nace cu un ambicion pa bira “rey” un dia, ta conoci mientrastanto.
Pero Aruba no tin ningun debe cu Mike, pa sigui soporta su trampanan. Al contrario. Mike tin un debe cu e pais cu a duna su persona oportunidad di hunga centro di creacion. Mike tin un debe cu Aruba, cu el a destrui y herida sin pieda.
Historia di Aruba ta mustra dede riba Mike, cu ta bolbe habri heridanan bieu di e momento cu Eman a pone Aruba bou pia di Antia Hulandes ora e Arubiano a entrega Eman e encargo pa saca Aruba for di e constelacion Arubano.
Mike ta biba den un mundo di fantasia cu el a crea pa su mes.
Kico Mike a haci pa Aruba, ora el a logra di tapa solo cu un dede y uza un spada pa corta cabez di Aruba pa e haya poder na Aruba?
Mike a bay busca poder den e huma scur cu a keda atras cu e Caso Fondo Desaroyo Nobo San Nicolas, uno di e berguensanan mas grandi den historia di gobernacion di Aruba.
Mike a entrega Pueblo di Aruba e promesa traicionero di deshaci di BBO pa asina e por a haya e poder cu e mester pa sinti su mes bon.
Ta cu e promesa traicionero di BBO Aruba a drenta 2009, ora ainda den Corte di Husticia e caso penal “Fondo Desaroyo Nobo San Nicolas” tabata resona pero cu pueblo a lubida cu e falsedad politico di deshaci di BBO.
Kico Mike a haci pa Aruba? Hulanda y Reino por splica Aruba esaki. Hulanda y Reino a keda na careda for di momento cu Mike a asumi poder na Aruba.
Nada Mike a logra pa Aruba.
Na 2013 cu mentira el a enfrenta Aruba den otro eleccion pa despues na 2014 manera un cobarde e bay sconde den Fort Zoutman te na momento cu Hulanda a mustra cu den Reino tin ley y no tin luga pa mucha cu no ta comporta nan mes.
Na Cuba Mike a drenta enlace cu Nicolas Maduro pa asina e trata di scapa su cara. Ya el a destrui Aruba cu tabata zink den debe y den cantidad di proyecto di Bo Aruba, cu te awe ningun hende sabi kico nan resultado lo ta pa Aruba.
Nicolas Maduro a probecha di Mike y di Aruba cu a scapa cu prome cu Citgo por a drenta, Nicolas a cay. Pero ni Nicolas Maduro a kere den Mike y ora Mike a bay ofrece su servicionan na Nicolas Maduro pa intermedia den e situacion na Venezuela, Nicolas a bisa Mike pa atende Mike su asuntonan na Aruba y laga Venezuela pa Nicolas.
Na 2017 Mike a bolbe huy ora Aruba a bisa ta basta.
Aruba mester a recupera di e heridanan nacional cu Mike a ocasiona. Aruba a cuminsa recupera den un pandemia y cu ayudo di Hulanda.
Awe Mike kier bolbe pa sigui destrui.
Manera un terorista Mike a ataca tur instancia cu e por a ataca na Aruba verbalmente, despues cu el a pone un sospechoso riba su lista di candidato y asina a cubri Aruba cu e lodo cu un detenido ta miembro eligi di Parlamento di Aruba.
Ta tristo cu AVP no ta coregi Mike pero kier sigui habri caminda pa Mike, e homber cu a destrui Aruba prome cu Covid-19 a bati na porta, pero kier sigui destrui Aruba basta e por tin poder, publicidad, posicion cu e mes no por a crea pa su mes como un profesional pero a uza Pueblo di Aruba, placa di Aruba, suelo di Aruba pa e alcansa.
Aruba mester sigui cana. E unico regalo cu Mike nunca a entrega Aruba tabata tres palabra: “Requiescat in Pace”, sosega na paz Aruba mientras Mike y su grupo ta probecha!
