ORANJESTAD (AAN): Na final di jornada di reunion cu stakeholders teni cu Formador den siman cu a pasa, dado momento un instancia cu tambe a reuni cu nan tabata Serlimar SG y tambe Setar NV.
Riba pregunta di prensa si acaso Gobierno ta cana cu e idea di bende e accionnan cu nan tin den compania Setar NV, aki formador Evelyn Wever-Croes a bisa cu esaki ta definitivamente algo cu Gobierno no kier.
Aunke realmente no a haci ni un investigacion pa sa ki beneficio e por tin, pero en general Gobierno aki ta contra bende accionnan. Tempo cu Hulanda a bin cu e prome concepto di Landspakket na Juli 2020, tabatin un stipulacion den dje cu e CHE (prome cu COHO) por dicidi cual accion Gobierno por bay bende, y nan mes lo cumpre. Di e tempo ey caba Gobierno di Aruba a bisa Hulanda cu preferiblemente no kier papia di esey.
“Esey ainda ta e posicion, pues nos no ta ni pensando riba bende ningun accion,” Wever-Croes a finaliza bisando.
