Scol Basico Santa Famia a ricibi containernan cu materialnan for di Hulanda

ORANJESTAD (AAN): Dialuna ultimo Minister Endy Croes a bishita scol basico Santa Famia na Pos Chiquito en conexion cu dos container yen di mobilario cu a yega pa dicho scol.

             Presente na e ocasion special aki tabata directora di SKOA sra. Anuesca Baly, manager di AFAS, sr. Rothmar Coenraad y director di e scol Santa Famia sr. Sigfried Kelly.

            Un total di nuebe container cu lo yega Aruba y esakinan lo wordo distribui na diferente scol. AFAS Foundation ta patrocina e proyecto aki den colaboracion cu 'Stichting Miss IQ' di Alkmaar hunto cu SKOA y Gobierno di Aruba cu ta haci esaki posibel.

            Cabesante di scol Santa Famia sr. Sigried Kelly a keda masha contento y a gradici AFAS Foundation, Minister Endy Croes como tambe directora di SKOA sra. Baly pa e bunita contribucion y donacion di materialnan cu sigur e scol lo haci bon uzo di nan paso ta material cu nan tin mester. Directora di SKOA sra. Baly a gradici AFAS Foundation y tur cu a colabora pa awe e scolnan ta haya materialnan for di Hulanda y a enfatisa cu ya caba a haci cuatro scol contento.

            Sr. Coenraad di AFAS a expresa cu nan ta sumamente satisfecho di por a contribui manera aña pasa. Ta di dos biaha cu AFAS ta haciendo e proyecto aki y sigur no lo ta e ultimo. Na luna di october proximo un otro carga ta biniendo Aruba. AFAS Foundation ta sigui haci mas scol contento, primordialmente tur nos muchanan paso AFAS ta para pa esey y caminda cu AFAS por yuda e muchanan den loke ta trata enseñansa y pa biba mas saludabel AFAS ta contribui grandemente paso e muchanan ta nos futuro. Sr. Coenraad a gradici e Mandatario di Enseñansa pa su cooperacion sin esey no por a logra trece e containernan.  

            Minister Endy Croes ta gradici AFAS Foundation. E container ta wordo poni disponibel na Hulanda  y aki AFAS ta hunga un rol hopi grandi pa por trece e containernan Aruba. Esaki e ta un accion di colaboracion y nos como Gobierno sigur ta para pa duna sosten na tipo di proyectonan bunita asina pa nos muchanan’ e Mandatario a finalisa.