ORANJESTAD (AAN): Durante un conferencia di prensa Diahuebs, Prome Minister Evelyn Wever Croes a papia riba tratamento di presupuesto di 2022.
Diaranzon ministernan Rocco Tjon y Glenbert Croes tabata na turno durante tratamento di e presupuesto, Diahuebs a toca turno na ministernan Ursell Arends y Dangui Oduber, Diabierna ta bay ta ministernan Endy Croes y Geoffrey Wever, mientras cu Dialuna ta toca turno na minister Xiomara Maduro y Prome Minister Wever Croes.
E Prome Mandatario a indica cu presupuesto 2022 ta bastante atrasa.
“Nos ta laat cu e presupuesto di 2022, e ta algo cu eingelijk mester tabata cla prome cu aña a bolter”.
Sinembargo, e retonan financiero cu nos a haya nos mes cune ta cambia cada rato y ta hacie dificil pa bo por traha un presupuesto.
Finalmente nos a pone un punto su tras, nos a prepare y nos a trahe, mientras cu nos a entrega tambe un nota di cambio y aworaki nos ta presenta e presupuesto cu honestamente mi tin cu bisa cu e ta bay ta algo preliminar, segun Wever Croes.
Prome Minister a sigui bisa cu esaki ta debi na e hecho cu debi na varios factor incluyendo e guera na Ukraine, no tin un stabilidad den e crecemento di economia.
“Nos tin cu biba cu e hecho cu economia ta subi, baha, subi, baha”, segun e Prome Mandatario.
El a sigui bisa cu e presupuesto ta hopi importante pasobra esaki ta e aña cu Gobierno a decreta como e aña di inversion y oportunidad.
“Esaki ta algo cu nos a purba di refleha den e presupuesto, pero nos tin cu tene cuenta tambe cu e limitacionnan financiero cu nos tin debi na e situacion financiero cu e pandemia a ocasiona”.
Pesey e espacio financiero cu tin por solamente pa locual ta realmente necesario, segun Wever Croes.
El a indica cu no ta bay tin inversionnan grandi di cambio pero si inversionnan den locual ta sumamente necesario
