Lissette Gomes di Fundacion Mi Voz Ta Bo Voz:
ORANJESTAD (AAN): Lissette Gomes di Fundacion Mi Voz Ta Bo Voz a duna di conoce cu actualmente e ta forma parti di un comision nacional di gobierno. A bisa cu recientemente nan raport a keda cla.
A haci un sondeo profundo den e sistema y recientemente a presenta esaki na gobierno. Tin cu present'e ainda na tur stakeholder cu a forma parti di esaki, a bisa.
Pronto comunidad lo haya mas informacion riba "unda tur e buraconan ta". No ta solamente e problema social eyfo, pero tin cierto cosnan paden tambe cu mester cambia. "E ta tuma nos tur pa tira bista, pa mira, pa papia, pa no keda keto, ni sikiera si ta famia pasobra e daño cu bo ta haci na e mucha ta enorme", Gomes a enfatisa.
Ta den man di e comision actualmente pa bin cu recomendacionnan pa gobierno y pronto ta bay tin un lista di recomendacion caminda ta bay aconseha gobierno kico ta e cambionan cu por bin pa pone mas forsa y proteccion den e parti di mucha mes.
E parti mas importante ta e parti di prevencion pa nada no pasa cu e mucha, Lissette Gomes a declara.
E ta kere cu prome cu April finalisa lo entrega e recomendacionnan aki.
