Satisfecho con Dia di Bombero a wordo celebra:

Comandante Jair Tromp di KBA:

*Coffie Morgen entrega di Diploma na 8 Chef Leader, Opendag y weganan

ORANJESTAD (AAN)-- Den entrevista cu DIARIO, Comandante di Brandweer (KBA), señor Jair Tromp, a elabora tocante e celebracion di Dia di Bombero, cu a wordo celebra dia 9 di October.

Nan a opta pa celebra nan Dia den forma di un Coffie Morgen cu e personal cu actualmente ta den servicio, y cu ex-coleganan di Brandweer, cu tambe a join den e celebracion aki.

Nan a combina esaki cu un Diploma Uitreiking, entrega na ocho colega cu a pasa nan examen di Chef Leader, door di e Instancia Oficial di Hulanda NIPV.

Comandante Jair Tromp, den un entrevista cu DIARIO, a expresa cu esaki ta un trabao cu ta exigi hopi di nan, pa haci un trabao cu hopi otro hende no ta dispuesto pa haci. Esaki ta encera candela of situacion hopi complica di un victima den un incidente. “Nos tin cu para keto tambe pa duna otro energia pa sigui haci e trabao bunita aki. E ta un profesion hopi bunita cu nan ta eherce hopi conciente, pero e ta exigi hopi di nos”, Comandante Tromp a reitera.

El a agrega cu despues di e slanan basta duro cu Cuerpo di Brandweer a haya ultimo añanan, ta su tarea pa trece nan hunto atrobe, y purba di gana e confianza di e trahadornan bek den e organizacion.

“E ta tarda un tiki pa gana e confianza bek, pero nos ta riba bon caminda y aki un par di aña lo ta bek den e lugar cu e mester ta. No obstante, e ta hopi satisfecho con e siman a bay, nan open dag cu despues di como siete aña nan a bolbe organiza, y e weganan, etc. Por mira cu poco, poco e coleganan ta kere den e proyecto y mi ta mira cu pa otro aña e actividad lo bira mas bunita cu e aña aki”, Comandante Jair Tromp a expresa.