Carolina Thiel-Span, Presidente:
ORANJESTAD (AAN)-- Siguiendo cu e entrevista di DIARIO cu señora Carolina Thiel-Span, Presidente du Fundacion Autismo Aruba, despues cu nan a participa den e Conferencia “Evidence to Action” na Miami, el a comparti cu e ta contento cu e Comision Autismo Aruba ta keda bin dilanti, y Directie Onderwijs ta trahando riba cuater diferente maneho riba diferente punto, entre otro e doorstroming di studiantenan cu ta bay, por ehemplo, na un scol specializa, pero tambe e cuido cu ta wordo brinda, e rekisitonan di e cuido cu mester tin acceso na dje na scol.
Durante nos Congreso pa Educador, dia 14 di October, por ehemplo, nos ta bay enfoca bek riba e edad jong (0-6 aña). Semper nos ta purba di roter e ciclo di educacion, dus nos a enfoca riba edad un tiki mas grandi, awo nos ta bay na jong un biaha mas, unda nos ta bay enfatiza riba brinda e educadornan di muchanan di 0 pa 6 aña, e informacion basico di con pa reconoce pero tambe pa compronde e rolnan ey den e edad menciona, cerca ken nan tin cu señala, kico e rol di cada un ta, el rol di WGK por ehemplo, of di Respaldo, of Stichting Hunto, pa nan compronde asina tambe cerca ken nan mester ta, na ki momento”, Carolina Thiel a subraya.
El a agrega cu tambe tin e parti di regulacion y e sosten cu ta wordo brinda na e educadornan, unda lo enfoca riba “Teacher Care” pasobra mas y mas nan ta wak e dificultad cu ta pasa den e profesionalnan, y sigur esnan di educacion, unda cu nan ta wak tambe e necesidad pa un klas sigui crece, pero e sosten no ta crece parallel.
“Mientras tanto, nos a scoge pa durante e Congreso aki, pa tin un sesion specificamente riba locual ta ‘teacher care’ y e self care di educadornan tambe. Pues, e limitacion cu nan tin, pa reconoce esaki, y tambe ki ora pa pidi ayudo pa nan mes. Anto, no solamente pa e studiante pero pa nan mes tambe. Esey sigur ta interesante pa wak bek. E ta duna nos un sentimento di satisfaccion cu nos ta bayendo riba e bon caminda, cu nos por reconoce nos mes den partnernan internacional, y asina tambe nos haya e samenwerking, cu posible parnerships y organizacionnan internacional”,
Señora Carolina Thiel-Span, Presidente di Fundacion Autismo Aruba a relata.
E Congreso pa Educador di FAA lo tuma lugar mañan Diaranzon 14 di October, di 9’or di mainta pa 4’or di atardi, na Aruba Marriott Resort & Stellaris Casino.
