Sarah Quita ta un inspiracion pa nos tur!

Minister Gerlien Croes:

ORANJESTAD (AAN):  Diaranson ultimo na apertura di Aruba Hi-Winds a conmemora e beach di Fishermen’s Hut na nos 25x campeon mundial Sarah Quita. Esaki sigur ta algo grandi principalmente pa Sarah mes cu ta un inspiracion pa nos tur aki na Aruba.

            “Awe nos ta duna nos talento nacional Sarah Quita e reconocimento cu e merece,” Minister Croes a cuminsa ta bisa, “ Pa ja caba pa mas di 20 biaha Sarah Quita a sali campeon mundial den e diferente categorianan di Windsurf, unda cu el a hiba e nomber di Aruba tur caminda cu el a bay. Mi no ta kere ta nada mas mihor pa reconoce y dune su balor na su isla natal y asina yama e beach di Fishermen’s Hut na su nomber, unda Sarah a cuminsa di chiquito ta practica e sport aki.

            Durante e ceremonia bunita y emocional Sarah Quita a haya diferente elogio di diferente hende den nos comunidad manera Minister President y coleganan di Gabinete AVP-FUTURO, CEO di ATA Ronella Croes, y periodista di deporte conosi sr. Seever Krozendijk, pa nombra algun.

            Sarah Quita sigur ta un inspiracion pa nos tur, un ehempel bibo di cu no ta importa di unda bo ta, pero cu si bo ta dedica y determina, tur cos ta posibel. Un biaha mas un pabien na nos campeon mundial Sarah Quita cu merece e reconocemento aki y mucho mas.