Monumenten Planning Bureau ta tuma iniciativa pa preserva  patrimonio educativo

Restauracion di Beatrixschool:

ORANJESTAD (AAN): Prome Minister mr. Mike Eman, acompaña pa arkitecto sra. Daphne Every, experto den restauracion di monumento, a haci un inspeccion di e edificio bashi dilanti di Reina Beatrix School, conoci anteriormente como e lokaal di Informatica di Juliana School, situa den Beatrixstraat.

            E meta di e bishita ta pa mira e posibilidad pa ubica y prepara e grupo di arkitecto di Monumenten Planning Bureau, cu lo asumi e trabao di restauracion di Reina Beatrix School, un institucion educacional importante den nos historia. Den e mesun edificio aki lo ubica e arkitectonan cu lo bay documenta e historia di e scol Reina Beatrix y Juliana.

            Prome Minister Eman a indica cu, mirando cu e cabesantenan di e scolnan historico aki ta personanan hopi activo ainda, ta esencial pa capta y preserva e historia di e school y di studiantenan cu a bira personanan prominente den comunidad cu a forma parti di e schoolnan aki.

            E plan di restauracion y renobacion ta inclui no solamente e trabao fisico, sino un proceso di documentacion integral, pa asina crea un fundeshi cultural historico cu ta sirbi e generacionnan di awe como esnan di futuro.

            Promer Minister mr. Mike Eman a splica cu hunto cu Minister di Enseñansa, mr. Gerlien Croes, ta sondeando e posibilidadnan strategico pa cu e edificionan aki. Esaki por inclui

• Muda Reina Beatrix School bek pa su edificio original, of
• Considera muda e afdeling Arubiana di Biblioteca Nacional, cu actualmente ta den Bachstraat, pa e edificio historico di Beatrixschool.

Apesar cu no tin decision definitivo ainda, e dialogo ta andando pa evalua e miho uzo posibel di e edificionan historico aki, pa sirbi comunidad di manera funcional y inspirativo. Den esaki ta tene na cuenta tambe e deseonan expresa.

            Promer Minister mr. Mike Eman a bisa cu den algun dia, lo inicia e renobacion di e ex-lokaal di Informatica, pa haya un edificio cla pa ubica e arkitectonan di Monumenten Planning Bureau, Restauracion Beatrixschool, encabesa pa akitecto Daphne Every y e team cu e lo forma pa e tarea aki di restauracion di Beatrixschool. Mientrastanto ta pendiente di e status di Julianaschool. Eman ta spera cu pronto tin claridad rond di temanan huridico pa por cuminsa desaroya e plannan pa restauracion di Julianaschool tambe.