Santa Rosa tambe lo tin su 'pop-up market' awe diasabra

Nathalie Maduro, directora di Santa Rosa:

ORANJESTAD (AAN):   Directora di Santa Rosa, Nathalie Maduro a duna di conoce cu nan a tuma nota cu United Farmers Aruba (UFA) a cuminsa c'un bunita iniciativa na nan dos localidad di nan miembronan, esta Str Agriculture y 297 Farm. Nan a cuminsa c'un 'pop-up market'.

            El a agrega cu si nan miembronan tin cosecha, nan ta pone disponibel pa benta cerca nan. Santa Rosa tin hopi cunukero cu ta registra na Santa Rosa, pero nan no ta miembro ainda di UFA. Pesey a pensa cu lo ta un bunita manera pa duna nan e oportunidad cu nan tambe por tin un lugar pa bende nan productonan riba diasabra mainta.

            Asina a bin cu e idea di un 'pop-up market'. No ta manera e mercadonan cu Santa Rosa ta organisa y cu tin cuminda crioyo, productonan herbal y natural. Den e  caso aki, e ta solamente pa e cunukeronan, criadonan y piscadonan cu ta interesa di bende nan productonan.

            Maduro a enfatisa cu Santa Rosa mes no ta bay ta bendiendo niun producto di na. E dia aki ta bay specificamente pa e cunukeronan. Door di esey mes no a cobra nada. E intencion ta pa pone nan espacio disponibel.

             A haya un grupo basta diversifica di cunukeronan. Tin personanan cu ta bende carn'i porco, carn'i baca, carn'i coneu, bonchi, lechuga, webo, honing, concomber,  etc. Ta trata di productonan cu ta wordo bon bendi caba na supermercadonan. Den e caso aki kier probecha cu tin mas mercado of e 'pop-up markets' pa crea un tipo di experiencia, Maduro a indica.

            Tin hende cu ta mirando hopi mas area di plantacion, pero nan no ta haya e posibilidad di purba e productonan. Si e biaha aki bay bon, e intencion ta pa comparti e informacion cu hotelnan, AHATA, taxistanan pa nan sa cu diasabra mainta ta un dia caminda cu por bay experencia algo diferente.

            Ta spera cu comunidad por sostene e cunukeronan. Por wak cu ta bende hopi mas producto y cu tin mas producto disponibel, pero kier crea un manera mas facil pa yega y haya diferente tipo di producto, e directora di Santa Rosa a expresa.

            Mester agrega cu e concepto aki di 'pop-up market' ta hopi exitoso na paisnan den Latinoamerica como tambe na algun countynan na Merca.

            Ta di spera cu e idea aki por ta un motivacion pa e sector di agricultura di Aruba cu por mira cu den e ultimo añanan ta hayando mas y mas empuhe.

            E 'pop-up market' lo tuma lugar na Santa Rosa (8 am - 11 am), Str Agriculture (9 am - 11 am) y na 297 Farm (9 am - 11 am).