Marinus Wegereef
ORANJESTAD (AAN) – Diabierna 24 di Maart, a tuma lugar un conferencia di prensa, den e prome Centro di Training pa Husticia, cu ta carga e nomber di e Polis, semper recorda, Tino Ruiz (den feliz memoria).
E conferencia di prensa a wordo conduci pa señor Marinus Wegereef, ken a expresa cu den nomber di e mayornan di Tino Ruiz, cu te ainda nan emocionnan ta hopi fuerte y no por ta presente den e rueda di prensa aki.
Wegereef ta hopi gradici di por a introduci e Training Center pa Husticia. E tabata na mesa hunto cu Marc Fowler y Khayri Heyliger, cu ta e dos personanan encarga cu henter e simulacro unda tabata presente esnan cu ta “practical shutting”, Money Transfer, pero e parti di husticia ta nan mes ta organiza.
“Pues nos tin un contacto directamente cu e leiding di KPA, y tur esnan cu ta traha den husticia. E meta di e centro di training ta, eigenlijk, basa riba e accidente terible cu a sosode un par di aña pasa, unda un polis a perde su bida, pagando e prijs di mas halto cu tabata tin. Akinan, nos a bisa como comerciante, y particular, na unda nos por yuda, conhuntamente, e polisnan cu ta riba caya pa nan haya mas proteccion”, Wegereef a indica.
El a agrega cu door cu tur aña e ta bay Merca pa un conferencia masha grandi y el a bay cu e idea di wak kico tin riba e mercado. El a topa eynan cu e representantenan di un compania di Houston, cu tin nan centro internacional full na Merca y nan ta traha hunto cu e Forza Policial di Merca, na unda por siña con pa mehora e training ora polis ta actua bao presion.
Nan tin un sistema masha avanza ora polis ta enfrenta un situacion cu persona cu problema mental, por ehemplo. “Y nos ta hopi contento, cu hasta e meneer di Curacao cu ta cu vacacion akinan, a yama mi pa check e sistema, y e ta sumamente entusiasma, y sigur e lo papia cu su leiding pa wak si Corsow por bin Aruba, pa hunto cu polis di Aruba traha hunto riba un proyecto”, Wegereef a indica.
El a agrega cu apesar cu banda di e simulacro cu nan tabata tin, nan tin mas curso pa esnan cu ta traha. Tin por ehemplo, señora Diandra Gomez, cu a caba su estudio Forensics pero door di e ley cu ta existente y e no por traha den forensic pero e mester a bira polis.
“Pues, loke nos a palabra cu Diandra ta pa organiza cursonan basa riba forensics. E por ta pa hendenan di prensa, of den abogacia, studiantenan di Universidad, of pa nan sa kico ta sosode ora algo ta pasando, por ehemplo den hotel, y pa nos tur hunto compronde e forensic y tur hende por ta riba un linea”, Wegereef a señala.
