E jellyfish aki tey ora tin hopi biento
WILLEMSTAD: Personanan cu bishita beach e dianan aki mester tene cuenta cu presencia di e jellyfish conoci como ‘Pechi Portugues’.
Autoridadnan na Curaçao encarga cu Salubridad, Medio Ambiente y Naturalesa (GMN) a bati alarma despues cu a registra hopi Pechi Portugues na parti zuid di e isla.
Manera ya ta conosi, practicamente tur aña den e temporada aki cu hopi biento, ta señala Pechi Portugues na parti zuid di Curaçao.
Ta conseha personanan cu ta bishita lama e dianan aki pa paga bon tino. Pechi Portugues ta relativamente facil pa mira den laman. Cu mira algo manera un blas of saco di plastic lila yena cu aire ta drif den laman, no drenta awa y alerta esnan cu ta den laman e momento ey pasobra su tentaculonan bao di awa por alcanza un largura di hasta 30 meter.
Pechi Portugues ta biba den awanan mas den direccion di costa di Venezuela. E forma di e Pechi Portugues ta di tal manera cu e ta move den laman den direccion cu biento ta supla.
Si bo bini den contacto cu e tentaculonan, kita restante cu keda riba e cuero sin grawat’e, laba e cuero cu awa di laman y aplica awa low of vinager regular slap (1 pa 2 dopi den 2 liter di awa) riba e area afecta. Si e area afecta keda kima of haci dolor intenso of cu haya sintomanan di alergia manera dolor di cabez, sacamento, etc., pone ijs riba dje y bishita bo docter di cas.
