San Nicolas Business Association ta sigui encurasha tur desaroyo pa e zona aki

Andres Hernandez:

ORANJESTAD (AAN): Kico ta sperando San Nicolas y su futuro pa cu e tereno di refineria.  Hopi escenario a ser treci dilanti, principalmente e idea pa San Nicolas porfin haya su Waf bek.

   E Asociacion di SNBA na San Nicolas tambe ta siguiendo al tanto di tur esaki, y nan tambe ta move pa keda mantene contacto y mira si por yuda den busca esnan cu lo kier desaroya parti di e zona aki.

   Andres Hernandez ta president di San Nicolas Business Association a mustra cu nan ta keto bay ta warda desaroyonan pa cu e proyecto pa Eagle LNG bin cu terminal di gas natural eynan den futuro.

   Pero ademas di esey, SNBA mes ta sigui pusha pa mas desaroyo, y riba nan mes iniciativa a reuni cu VNO cu ta representacion di Hulanda na Aruba, y tin un reunion pendiente ainda pa e management team di Port of Rotterdam cu tabata interesa den San Nicolas.  Tin tambe interes di Aruba Ports Authority pa participa den desaroyo na San Nicolas.

   Kico realmente lo bay pasa cu e tereno di Refineria mes y su eventual re-desaroyo y cu e plan di Waf, keto bay ta status quo, pero hecho ta cu SNBA no a para keto y tambe di su banda ta contribuyendo pa mira ki futuro lo por crea eynan.

   Segun Hernandez, e plan pa desaroya un Waf aki ta bay ta ubica mey-mey di e tereno di refineria, y tereno di e tankinan di warda crudo of combustible.  Pues e Waf lo bay “interumpi” e comunicacion di refineria y tankinan.  Pero pa SNBA lo mas importante ta pa San Nicolas haya bek full acceso pa lama cu e Waf aki.

   Tin biaha mester no solamente pone e necesidad di pueblo den balance, y analisa loke henter e isla tin necesidad di dje.   Pa awor SNBA ta keda kere cu e momento a yega pa San Nicolas keda sigui desaroya, y ya caba ta mirando algun movimento riba diferente tereno.

   Aki ta unda cu Hernandez a comenta, cu varios hende cu ta huur nan cas of apartamento riba Airbnb cu turistanan, ta notando un aumento di esaki.  Esey ta habriendo caminda pa mas bishitante cuminza hospeda den e parti importante aki di Aruba, y lo bay haci un diferencia den volumen di bishita pa San Nicolas.

   E President di SNBA a divulga tambe cu tin un grupo cu ta buscando edificionan pa cumpra na San Nicolas, pa asina bay haci un ‘desaroyo’, pa moderniza nan, haci e plannan mas organiza, y haci e parti aki mas organiza.  Esaki ta hopi positivo pa San Nicolas, y SNBA lo sigui traha pa encurasha tur esey.