Partido AVP ta bay duna asistencia cu yenamento di belasting na YMCA San Nicolas

ORANJESTAD (AAN): Diahuebs Awor, 27 di October 2022 Partido AVP lo brinda asistencia pa cu yenamento di formulario di Impuesto na e comunidad di San Nicolas.

            Desde e luna di September Partido AVP a inicia cu anochinan di asistencia pa cu yenamento di e formulario di Impuesto na Cas di Partido Playa. For di tur skina di Aruba ciudadanonan a asisti na Cas di Partido pa asina ricibi ayudo cu nan formulario di e equipo di expertonan voluntario. Centenares di ciudadano a bini Cas di Partido playa pa ricibi asistencia e ultimo siman nan tras di lomba y centenares di formulario di impuesto a wordo yena. Partido AVP ta contento cu e reacion di nos comunidad y ta intenta pa mehora e servicio cada aña pa asina por sigui asisti nos ciudadanonan.

            Diahuebs awor, 27 di October 2022 Partido AVP lo brinda asistencia pa cu yenamento di formulario di Impuesto na e comunidad di San Nicolas. Pa 7or te cu 9or di anochi e team di voluntario lo ta presente na YMCA SAN NICOLAAS pa asina asisti e comunidad di San Nicolas cu yenamento di e formulario di impuesto 2021(Inkomestenbelasting).

            E documentonan necesario cu lo mester trece ta resumen di entradanan pa aña 2021 (Loonopgaaf), Cartanan di interes di hypotheek (APFA,FCCA OF BANCO), carta di interes di prestamo personal (BANCO, ISLAND FINANCE OF TOTAAL FINANCE),recibo of comprobante di gastonan extraordinario y adicional (CUIDO MEDICO, ESTUDIO y GASTONAN IREGULAR) efectua den e aña 2021.

            E ultimo fecha pa entrega e formulario na departamento di impuesto ta 3 di december. Partido AVP ta haci un invitacion cordial na tur ciudadano nan pariba di brug cu tin necesidad di ayudo, pa asisti Diahuebs 27 di October pa 7or di anochi na YMCA SAN NICOLAS.