San Nicolas a experiencia Electra Discovery Tour na YMCA

ORANJESTAD (AAN):  Danki na YMCA San Nicolas pa invita ELMAR y pa crea un espacio caminda nos por inspira e proximo generacion di hoben talentoso.

ELMAR su team di Grid Quality Management a transforma e dia den un aventura educativo, caminda curiosidad y energia a guia tur actividad.

ELMAR ta contento di a bolbe na YMCA San Nicolas, despues di recientemente completa su prome workshop di digital literacy pa adulto mayor “Workshop Klik y Siña”, realisa conhuntamente cu facilitador Jacqueline Woodley. E bishita e biaha aki tabata dedica na e muchanan, cu e Electra Discovery Tour como media pa inspira, siña, y motiva.

Durante e tour, e muchanan por hunga weganan electrico pa compronde e base di circuito y fluho, subi riba un bucket truck pa biba e experiencia di un Lineworker, y siña tocante e red di electricidad bou di tera. Un mundo nobo pa hopi di nan.

E experiencia tabata no solamente educativo, pero tambe inspiracional, dunando nan un bista real riba e profesion cu ta mantene Aruba ilumina.

E tour ta parti di un mision mas grandi, ELMAR ta spera cu Electra Discovery Tour lo yuda motiva e proximo generacion pa aprecia e balor di energia y explora un carera den electricidad y ingenieria.

ELMAR ta gradici nan Team di Grid Quality Management pa nan dedicacion na e proyecto aki.