Diadomingo anochi tin certamen final pa Miss Universe Aruba 2025

My Dream Institute Foundation Aruba ta organizando

ORANJESTAD (AAN): My Dream Institute Foundation Aruba, cu ta e representante oficial di Miss Universe Aruba, tin e gran honor pa presenta e anochi final di certamen y coronacion di Miss Universe Aruba 2025 cu lo tuma luga Diadomingo 10 di augustus 2025, na e Ballroom di Paseo Herencia, cu ta bao maneho di Cas di Cultura.

   Den e anochi glamoroso aki, lo wordo corona e Reina nobo como e sucesora di srta. Anouk Eman, kende ta Miss Universe Aruba 2024 y a sali den e Top 30 di Miss Universe for di 130 Pais na Mundo. E Miss Universe Aruba 2025 lo representa Aruba na e di 74 certamen di Miss Universe 2025 riba 21 di november 2025 na Bangkok, Thailand.

   Den un reunion intimo na Carmen Steffens, dia 29 di juli, e cuater damas, hunto cu miembronan di organizacion y un di e colaborado pa e anochi final, a tene e sorteo pa determina e secuencia official pa e anochi di eleccion.

   Pa e anochi final e participantenan lo presenta den e siguiente secuencia: (1) Sammie van Pinxteren.  (2) Hannah Arends.  (3) Emily van Spaandonk.  (4) Tishaina Silvania.

   E programa pa e anochi lo ta yena di elegancia, emocion cu lo inclui e segmento di trahe di baño, pa demostra confiansa propio, e reto di discurso inspiracional, unda nan lo comparti mensahe pa inspira y empodera.

   Tambe lo inclui segmento di presentacion di nan trahe di gala, pa estrena nan beyesa y elegancia, y e ronda di pregunta y respuesta, un momento fundamental pa e certamen.

   Apart di e presentacion nan, publico presente lo presencia e despedida oficial di srta. Anouk Eman, marcando e finalisacion di su reinado como Miss Universe Aruba 2024. Durante e anochi final Miss Universe Aruba Ambassador, srta. Angie Dirks, conhuntamente cu e carismatico sr. Addonsito Croes, lo conduci e anochi espectacular aki pa haci e experiencia uno inolvidabel.

   Invitacion pa Aruba: My Dream Institute Foundation Aruba kier a extende un invitacion publico pa e pueblo di Aruba pa bin apoya e cuater candidatanan. Bo por cumpra bo ticket personalmente via e candidatanan, via Instagram di @missuniversearuba_official of @mimarketings, of por tuma contacto via

WhatsApp na 593-7672.

   My Dream Institute Foundation Aruba y henter e team, kier expresa un danki special na tur instancia y persona nan cu a colabora, sponsor cu den un manera of otro a confia pa haci e anochi final posibel.