Tratamento di Presupuesto 2024 di Pais Aruba den Parlamento
- “Tur conseho riba Presupuesto 2024 ta positivo y ta refleha un crecemento economico grandi pa Aruba”
ORANJESTAD (AAN): E siman aki ta tumando luga tratamento di Presupuesto 2024 di Pais Aruba den Parlamento. Prome Minister Evelyn Wever-Croes a remarca cu e presupuesto aki a worde entrega na tempo Parlamento y cu un surplus segun palabracionnan. Esaki ta e di dos presupuesto cu ta conoce un surplus di 1%, 70 miyon Florin.
Ademas, tur conseho riba Presupuesto 2024 ta positivo y ta refleha un crecemento economico grandi pa Aruba un biaha mas basa riba nos turismo cu ta creciendo enormente bon, desempleo cu ta bahando, inflacion cu ta bahando y ta mas abou cu den otro paisnan den region, nos cifranan macro-economico ta mustra bon.
“E reto grandi y e compromiso di Gobierno di Gabinete Wever-Croes pa 2024 ta pa e progreso y bienestar cu cifranan ta demostra, worde traduci pa asina cada ciudadano di nos pais sinti’e den nan hogar y den nan cartera. Nos ta spera di por haya aprobacion di Parlamento pa asina sigui cu e trabaonan”, Prome Minister a enfatisa.
Dialuna ultimo, Parlamento a aproba e Presupuesto Supletorio 2023 cu un biaha mas mester a worde cambia y e biaha aki no pasobra Gobierno mester mas placa sino pasobra Gobierno a haya extra placa. Contrario cu den pasado durante e gabinete di un otro asignatura, nan tabata bay Parlamento ora cu nan mester mas placa.
Prome Minister a duna di conoce cu Gobierno a haya extra placa pa motibo cu economia a draai asina bon basa riba e maneho di turismo, cu e entrada cu mas turista cu a drenta nos isla treciendo hopi placa extra cu a drenta caha di Gobierno. Pa cua motibo tambe, Triple A por a duna mas dividendo na Gobierno. Tambe tabata tin un agio. Esaki ta ora cu e Minister di Finansa ta emiti pa financia debenan biew, y inversionistanan, kendenan tin interes halto den bono di Aruba y ta kere hopi den Aruba, a paga mas di loke e bono ta. E extra aki, tambe a bay den caha di Gobierno.
Prome Minister a splica cu si Gobierno kier uza e extra placa aki pa inverti den proyectonan, mester bay Parlamento pa cambia e Presupuesto, loke a pasa tambe dialuna ultimo y Gobierno a haya aprobacion di 29 miyon Florin adicional pa proyectonan. Cu esaki, dos scol nobo lo worde construi incluyendo un scol secundario na Paradera. Tambe tin proyectonan di digitalisacion pa mehora servicio den Gobierno, a pone mas placa pa personal di SABA entre otro. Gobierno y pueblo di Aruba ta gradici Parlamento pa aproba e placa aki pa proyectonan den nos comunidad.
“Aworaki, mi ta spera cu nos keda cla cu tratamento di Presupuesto 2024 pa asina Gobierno, Parlamento y comunidad di Aruba habri aña sabiendo kico ta e metanan y kico ta e vision y con nos lo bay logra pa e cifranan bunita di economia, finansa, desempleo cu ta musrando bon, worde sinti tambe den progreso y bienestar den cada hogar den nos pais”, Prome Minister a expresa.
Varios Minister ya a presenta den Parlamento pa elabora riba nan maneho financiero y diabierna, Prome Minister ta den Parlamento tambe pa duna informacion di maneho financiero di su ministerio.
