President Edward Maduro di SADA:
- Tur esey sin cu a contact e Sindicato mes
- Aduana ta OK cu camera pero kier sa ‘ken ta vigila’
ORANJESTAD (AAN) Señor Edward Maduro, Presidente di Sindicato di Aduana (SADA), a mustra den entrevista cu Matutino DIARIO, su desacuerdo cu e actitud di Minister Geoffey Wever, cu a haci un declaracion desde Hulanda, y e sindicato kier a dune un “update cortico”.
Esaki tin di haber cu e walkout di Diabierna cu a pasa di Aduana na Aeropuerto Reina Beatrix relaciona no cu e camaranan di seguridad cu a keda instala paden dirigi riba e ‘visitatie kamer’ unda Douane ta controla tur pasahero na Aeropuerto, debi cu Douaneronan tabata kier sa ta kendenan tin acceso pa wak e imagennan. Sea ta AAA NV ta wak e videonan of ta Douane mes?
Maduro a bisa cu ningun momento e sindicato a tuma nota di postnan den prensa ni comentarionan cu a wordo lanza den diferente post di noticia. “Nos tin cu enfatiza cu Aduana of Sindicato SADA ni su miembronan, ningun momento tabata contra cu camara ta wordo poni den e camber di bishita. Esey no ta e hecho; e hecho primordial ta kendenan tin acceso pa wak e imagennan di camara.
Nos mes pa añanan ta bogando pa pone camara, pa garantiza e seguridad di tanto nos coleganan, miembronan di Sindicato SADA, pero tambe di e pasaheronan. Nos a tuma nota di comentarionan cu a wordo lanza, y nos ta wak cu tin ora hendenan ta bisa cu esaki ta pa garantiza cu esaki ta pa stop cu abuso di poder di ambtenaarnan cu ta controla. Nos ta bisa na e pasaheronan, clientenan di Aduana, cu ta sinti cu nan derecho ta wordo trapa door di un ambtenaar, nan tin tur e caminda pa entrega un keho. Esaki no ta algo secreto ni algo nobo. Semper e por a pasa”, Edward Maduro, lider sindical di SADA, a señala.
El a agrega cu netamente e camara lo yuda pa si den dado caso pasaheronan ta sinti cu nan derecho ta wordo trapa, of abusa den e forma cu nan ta wordo trata, ora nan entrega un keho por wak den e camara building pa wak si e kehonan aki enberdad ta funda, of ta simplemente kehonan infunda. Esaki ta sosode masha hopi mes.
“Pa e motibo aki nos tin cu pone enfasis cu nos no tin problema cu e camara, pero e hendenan cu ta wak e imagen di camera ta locual nos ta condena, pasobra obviamente no ta e Cuerpo di Aduana tin acceso na e imagennan”, Edward Maduro a remarca.
“Bolbiendo riba e parti unda cu Minister di Finanzas a duna un declaracion of el a “copy paste” locual Cuerpo di Aduana a publica riba medionan social, y nos ta lamenta esaki masha hopi mes, pasobra e Minister di Finanzas, cual ta e Hefe directo di Aduana, nos sa cu e no ta na Aruba, pero e tin e number di contacto cu e sindicato SADA. Pues, nos ta lamenta cu e texto cu Dienst di Aduana a publica y a post’e comosifuera ta un comentario di su persona”, el a señala y a indica tambe cu SADA a haya hopi critica. Hopi miembro di e seccion di aeropuerto a acerca e sindicato, a cuestiona hopi e actitud aki.
https://diario.aw/categories/noticia/general/sada-ta-cuestiona-y-lamenta-declaracion-di-minister-di-finanzas-haci-na-hulanda#sigProIdfc6ba58a0c