ORANJESTAD (AAN): Quota International di Aruba a wordo honra cu e invitacion di e organisacion Miss Teen Aruba International
pa hiba un discurso tocante Empoderacion di Hende Muhe na nan evento Miss Teen Speech 2025. Ex-Presidente di Quota International di Aruba, señora Farida Feliciana-Figaroa a duna un discurso na unda a menciona e historia di Quota pa enfatisa cu for di aña 1919 tabatin necesidad pa hende muhe crea un ambiente, na unda hende muher profesional por colabora pa traha na bienestar di nan comunidad.
Mision y obhetivonan di Quota International di Aruba a wordo splica na e publico y tambe nan actividadnan y e importancia cu nan ta pone na crea oportunidadnan pa metanan di nos grupo; esnan cu tin dificultad pa tende, hende muhe y mucha.
Tambe a enfatisa e importancia di hende muhe pa participa den organisacion di boluntario.
Nan rol ta pa inspira y como hende muhe nos mester empodera otro pa yega na nos pleno potencial, desaroya abilidadnan y brinda oportunidadnan pa impacta nos comunidad positivamente.
Quota International di Aruba a desea e participantenan di Miss Teen hopi exito y a encurasha nan pa uza e experiencia cu nan ta haya como stepping stones pa nan desaroyo personal cu na su turno por wordo uza na bienestar di e comunidad di Aruba.
